Хөл хорионы улмаас ажилдаа ирэх боломжгүй байгаа бол яах вэ?
Титэмт вирусийн дэгдэлтээс урьдчилан сэргийлэх зорилгоор хот, хот хоорондын авто замын хөдөлгөөний хязгаарласан. Энэ шийдвэр энэ сарын 3-ны 08.00 цаг хүртэл үргэлжилнэ. Үүний улмаас ажилдаа ирэх боломжгүй иргэд цөөнгүй байна.
Энэ тохиолдолд ажил олгогч таны ажлын байрыг хадгалах үүрэгтэй бөгөөд Хөдөлмөрийн хуулийн 66 дугаар зүйлийн 66.1-д заасныг баримтлан ажилдаа ирэх боломжгүй байсан хугацаанд үндсэн цалингийн 50 хувьтай тэнцэх хэмжээний олговор олгох үүрэгтэй.
Гэхдээ ажилтан хөл хорио тогтоосон бүсэд хамрагдсан болохоо өөрөө нотлох үүрэг хүлээнэ. Мөн гамшиг, хор уршгийг арилгахад өөрийн биеэр оролцсон бол цалинг бүтнээр олгоно гэж эрхзүйч Ж.Эрхэмбаяр зөвлөжээ.
Улс, хот хоорондын авто болон төмөр замын хөдөлгөөнийг хоёрдугаар сарын 23-ны 08:00 цагаас 27-ны 08:00 хүртэл зогсоох шийдвэрийг өнгөрсөн сарын 20-нд танилцуулсан юм. Дараа нь энэ сарын 3-ныг хүртэл хязгаарлалтыг сунгасан шийдвэрээ УОК хоёрдугаар сарын 26-нд буюу шийдвэр хэрэгжихээс урьдчилан мэдэгдсэн. Иймд зарим ААН ажилдаа ирэх боломжгүй болсон ажилчдадаа цалингүй чөлөө олгожээ.
Мөн зарим хуульч манай улсад халдвар илрээгүй, газар хөдлөлт, үер усны гэх мэт гамшиг нүүрлээгүй тул дээрх хуулийн заалтыг мөрдөх үүрэггүй гэж үзэж байна.
