Яадаг юм, улаан хүрэмтэй. Яадаг юм, Нарантуулаар орсон. Яадаг юм, хүн болгонтой гар барьж байгаа. Яадаг юм, аймаг болгонд очсон, очно…яагаад гэвэл энэ ард түмэнд итгэл үнэмшил, төрөө хүндлэх хүндлэл яг одоо үгүйлэгдэж байна. Энэ хүндлэл болоод итгэл хаашаа алга болсон юм бэ гэж үү? Манай энхрий хайрт Элбэгээ тэргүүтэй АН-ынхан Америкаас импортолж авчирсан алуурын технологи Монголд 20 жил хэрэгжсэний эцэст хүссэн үр дүндээ хүрч, монголчууд хэнд ч, юунд ч итгэхээ больж, хэнийг ч, юуг ч хүндлэхээ байж, нэг нэгнийгээ үгээр алж, үйлдлээр няцаадаг болсон юм. Монголчуудыг монголчуудаар нь хэд дахин, хэдэн янзаар алуулдаг энэ технологийн үр дүнд нүдэндээ гэрэлтэй нэгэн хуурамч, нүцгэн гараараа амьдрал босгосон нэгэн худалч, ард түмэнтэйгээ адилхан байгаа нь поп, амласандаа хүрдэг нь топ, Монголын төлөө дуугарсан нь ичмээр эх оронч, монголчуудыг өмгөөлсөн нь гутмаар үндсэрхэг болж хувирсан.
Яг одоо энэ технологи 2020 оны сонгуулийн захиалгуудаар, Эрдэнийн гараар үргэлжилж байна. Итгэе гэхнээ лидер үгүй, инээе гэхнээ шалтгаан үгүй, саналаа өгье гэхнээ үнэмшил байхгүй, төрөө сонгоё гэхнээ үнэн байхгүй энэ цаг үед “Монгол Улс ковид-19-ийн эсрэг зогсож чадна, монголчууд сонгуулиа хийж чадна, ардчилсан төрөө сонгож хамгаална, амьдрал үргэлжилдэгээрээ үргэлжилнэ, ахиад ч илүү ихийг бид хийнэ” гэсэн ард түмний минь сүүлчийн ганц найдварыг Хүрэлсүх гэдэг хүн үүрч яваа юм. Тиймээс ганц бай бол Хүрэлсүх. Тэр улаан хүрэмтэй, улаан зангиатай, түүнийг хаанаас ч юугаар ч онилж болно. Ямартаа бие муу байгаа жүжигчин Цогоо гуайг чихдэж гаргаж ирээд Хүрэлсүхийг дайрсан захиалгат рекламанд тоглуулж байдаг юм. Ямартаа Дарханы замд болсон ослыг улстөржүүлэн мэдээлж, улай үзсэн хэрээ шиг сонгуулийн салхинд амтархан сэвж байдаг юм.
Ямартаа Польшид амьдралаас буцсан залууг бас Хүрэлсүхэд хамаатуулаад хаалга цонхоор хашгираад байдаг юм. Орцны чинь үүдэнд шавхай байгаад Хүрэлсүх буруутай, ачуулаагүй хогноос чинь үмхий үнэртээд байгаа бол Хүрэлсүх буруутай. Хошин шог, хогийн овоо, саар мэдээ, саарал будлиан болгоныг нэг л хүнд наагаад байгаа нь өөрөө нэлээн том шалтгаан. Учир нь гундаж явсан монголчууд Хүрэлсүхийн үед толгой өндийлгөж, гудайж явсан төр сэнтий зассан. Алив юм бүхэнд учир шалтгаан бий. Гэхдээ тэр болгонд энэ улаан хүрэмтэй нөхөр буруудаад, булшлуулаад байх ёстой бол одоо тэгээд барьж идэцгээ. Монголчуудын сүүлчийн итгэл найдварыг тээж, үүрч яваа түүнийг нулим, муу болгонтой хутга, муухай болгоныг хаягла, золиосло, зоргоороо нүд, балба, зод.
Тэгээд хэд дахин ал, хэд дахин булшил. Хүрэлсүхийн Засгийн газар АН-ын үед тавьсан өрийг хагасалж, цэвэрлэх байгууламжийг олон жилийн лагаас салгаж, утаагүй өвлийг авчирч…30 он дамнан яриад хийгээгүйг чинь гурав хүрэхгүй жилд шийдсэн…Бүүрэлхээд байдаг бүлэглэл чинь бүдүүрсэн үү гэхээс монгол хүнийг бодсон уу, үгүй. Монголын төрийг цөлмөсөн үү гэхээс өргөсөн үү, үгүй. Монгол хүний хийморь газраа тулаад, галынхаа дэргэдээс өндийх аядаж байна. Монгол Улсын төр тэнгэрээ үүрээд тэрлэгээ засах аядаж байна. Монголчуудыг монголчуудаар нь бүү алуул. Монголоо гэсэн бидний сэтгэл зүрх мохоогүй цагт Монгол мохохгүй! Яадаг юм, улаан хүрэмтэй. Яг энэ өдрүүдэд бүх Монголыг тойрно. Улаан хүрэмтийг алж байгаа арга болгон чинь, импортлосон технологи болгон чинь удамт Монголын зүрх сэтгэлийг сийчиж байгаа юм. Тэртэй тэргүй бидний зүрх хэдэн зууны хэрчлээст сорвитой…
За тэгээд одоо намайг мөнгөөр бичсэн гээд шүүмжил дээ, Монголын төлөө би энэ байтугайг бичнэ, энэ байтугайг туурвина, энэ байтугайг хэлнэ. Мөнгөөр бичлээ гэж хэлэхээс чинь айгаад мөрөө хөөгөөд мөнчгөрөө ганзгалаад, хувиа хичээгээд довоо шарлуудаад явж чадахгүй. Яагаад гэвэл би монгол хүүхэн за. Одоо тэгээд намайг ал, хэд дахин ал, Хүрэлсүхийг бичсэний төлөө ал. Энэ хүнийг залгихын төлөө намууд нэгдэж, бүлэглэлүүд мөнгө цацаж, шинэ нам, хөдөлгөөн байгуулцгааж байна. Яагаад? Ядарсан Монголд ганц лидер байж болдоггүй юм уу? Сайхан амьдраад байгаа нь хаана байна гээд уур чинь хүрээд уушиг чинь сагсайж явна уу? Сайхан амьдрал байтугай улс оронгүй болох гэж байсан улс одоо дөнгөж л тулгаа засч, галаа асааж байна, тойроод суухад торойгоод босдог заяатай шүү дээ, монголчууд.
Тойроод суучих вий, нэгдээд хөгжчих вий гэж айсандаа тонгорог шиг үгсээр толгой болгоныг цавчиж, сэтгэл болгоныг сэглэж байна, гэхдээ Монголыг Монголоор нь. Дарь үнэртэж буун дуу гарахгүй ч үгээр үндэстнийг унагааж, цэг таслалаар алж болдог эрин үед бид амьдарч байна. Яадаг юм, ядарсан Монголд ганц лидер байж болдоггүй юм уу, зүдэрсэн Монгол зүгээ олох гэж байна, бүү саад бол, бүх юм өөрийн гэсэн цаг хугацаатай.
Р.Эмүжин
