“Чингис хаан” банкны хувьцааг Хятадын хөрөнгө оруулалттай компани худалдан авч гэрээгээ хийжээ. Тодруулбал, БНХАУ-ын хөрөнгө оруулалттай “Баянмөнх техник дэвшил” ХХК “Чингис хаан” банкны хувьцааг худалдан авсан байна.
Монголбанкны ерөнхийлөгч Б.Лхагвасүрэн өнгөрсөн гуравдугаар сард “Чингис хаан” банкны дүрмийн сан 50 тэрбум байгаа. Тиймээс шинэ хөрөнгө оруулагч орж ирэх шаардлагатай. “Чингис хаан” банкинд хөрөнгө оруулъя гэж Өвөр Монгол хөрөнгө оруулагч нэг удаа Монголбанкин дээр ирж уулзсан. Ерөнхийдөө сонирхож байгаагаа илэрхийлж, хөрөнгө нь БНХАУ-аас орж ирнэ гэж хэлсэн. Гадагшаа хөрөнгө оруулахаар бол БНХАУ-ын Санхүүгийн зохицуулах хорооноос зөвшөөрөл авдаг учир олон шат дамжлагатай. Тиймээс дэмжээч гэсэн хүсэлт гаргасан. Монголбанк БНХАУ-аас Монгол Улсад суух Элчин сайдтай нь уулзаж, хөрөнгө оруулбал дэмжиж өгөөрэй гэсэн хүсэлтийг уламжилсан. Ийм процесс болсон. Яг эцсийн байдлаар хөрөнгө мөнгө нь орж ирээд, банкаа худалдаад, шинэ хөрөнгө оруулагчтайгаа гэрээгээ хийсэн зүйл байхгүй” гэсэн мэдээллийг өгч байсан билээ.
Тэгвэл зарим эх сурвалжийн өгсөн мэдээллээр Чингис хаан банкны хэлэлцээ дуусч, хөрөнгө оруулагчид худалдан авсан байна.
Энэ талаар Нийгмийн даатгалын ерөнхий газрын даргын албан үүргийн үүргийг түр орлон гүйцэтгэгч Ц.Ганцэцэг “Хятадын хөрөнгө оруулалтай компани Чингис хаан банкны хувьцааг авахаар Монголбанктай гэрээ хийчихсэн юм билээ. Бидэнд ирсэн мэдээллээр ганцхан НДС-гийн биш төрийн бусад байгууллагын өр төлбөрийг хариуцах нөхцөлтэйгөөр гэрээгээ хийсэн гэж ойлгосон. Тэгэхээр БНХАУ-ын хөрөнгө оруулалттай “Баянмөнх техник дэвшил” ХХК энэ төлбөрийг хариуцаад явна гэж ойлгож байгаа” гэсэн мэдээллийг өгсөн.
Одоогоор хэдэн хувийг нь ямар үнээр авсан гэсэн мэдээлэл байхгүй байгаа ч “Чингис хаан” банкны хувьаа эзэмшигч Б.Батхүүгийн “Чингис хаан” нэрийг 50 тэрбум төгрөгөөр, банкны баланс дээр дутагдаад байгаа 180 тэрбум төгрөг, лицензийг нь 50-60 тэрбум төгрөгөөр үнэлсэн гэсэн мэдээлэл байна.
Тус банкийг гадаадын хөрөнгө оруулагч худалдаж авснаар НДС, ЭМДС, ЖДҮДС-гийн хөрөнгийг гаргаж өгч, хохиролгүй болох боломж бүрдэнэ гэсэн хүлээлт бий.
Тус банкинд ЭМДС, НДС, төрийн болон төрийн өмчит хуулийн этгээдийн 140.8 тэрбум төгрөгийг байршуулж байсан ч авч чадахгүй байгаа.
