Монголын дөрвөн боксчин дэлхийн аваргын медалийн төлөө тулалдана

 

Германы Хамбург хотноо 2017 оны боксын ДАШТ болж байна. Энэ тэмцээний шилдэг наймд Монголын дөрвөн боксчин шалгарч үлдээд байгаа билээ.  

 

 

Тухайлбал, 49кг жинд ОУХМ Г.Ган-Эрдэнэ эхний даваанд гоц мөргөж, Туркийн Унлу Мухаммедтай гурван үеийн турш илүүрхэж шүүгчдийн 5-0 оноогоор ялалтаа авснаар шилдэг наймд үлдэв. Наймдугаар сарын 29-ний буюу өнөөдөр үдээс хойш Риогийн олимпын мөнгөн медальт Колумбийн Мартинес Ривас Юрбергентэй дэлхийн аваргын медалийн төлөө тулалдах юм. 

Харин 60кг-ийн жинд Риогийн олимпийн хүрэл медальт Д.Отгондалай өрсөлдөж байгаа бөгөөд эхний тойрогтоо гоц мөргөж, урд шөнө Израйлын Павел Ишченкотой тулалдаж, 5:0 ялснаар шилдэг наймд шалгарлаа. Хагас шигшээд үлдэх тулаанд Кабрера Луйстай үдээс хойш тулалдах юм. 

Тэгвэл 64кг-ийн жинд хүч ОУХМ Б.Чинзориг эхний тойрогтоо хийлсэн. Хоёрдугаар тойрогт Унгарын Ковач Ричардтай тулалдаж 5:0 илт давуугаар ялсан. Хагас шигшээ цаашлаад медалийн төлөө өрсөлдөх тоглолтоо Европын аварга цолтойгоор дэлхийн аваргад өрсөлдөж буй Армяны Ховханис Бачковтой хийнэ.

69кг-ийн жинд ОУХМ Б.Түвшинбат оролцож байна. Тэрбээр Польшийн боксчин Кивиор Дамиантай тулалдаж илт давуугаар буюу 5:0 яллаа. Наймд үлдэх тулаанаа наймдугаар сарын 28-ны үдээс хойш ДАШТ-ий хүрэл медальт Азербайжаны Багиров Парвизтэй хүч үзэж 4:1 ялсан. Дараагийн учраа эзэн орны боксчин Абасс Бараутай мөн л өнөөдөр үдээс хойш хийнэ.

Өнөөдрийн тулаанууд Монголын цагаар 21.00-01.00 цаг хүртэл явагдана. Ялалт байгуулвал наймдугаар сарын 31-нд Хагас шигшээ тулаанууд болох юм.