А.Энхтуул эх орноо дэлхийд сурталчилж явна

 Олон Улсын шатрын Их мастер А.Энхтуул өдгөө Европ тивд олон улсын цуврал тэмцээнүүдэд оролцож байгаа билээ. Тэрээр дэлхийн хамгийн шилдэг мэргэжлийн шатарчид оролцдог тэмцээнд эх орноо төлөөлөн 2 дахь удаагаа уригдан оролцохдоо домогт шатарчдын нэг дэлхийн аварга, ОХУ-ын шатарчин Владимир Крамниктай тоглож, ОУ-ын чансаагаа ахиулан шагнал авсан нь Монголын шатрын түүхэнд бас нэгэн тэмдэглэж үлдэхээр явдал боллоо. Үүний дараагаар Франц улсын Парис хотноо зохиогдсон тус улсын хамгийн томоохонд тооцогдох эрэгтэйчүүдийн рапид тоглолтын тэмцээнд мөн л олон улсын чансаагаа үнэмлэхүй нэмж, шагнал хүртсэн нь Франц улсад олны анхаарлыг татаад байна. Түүнчлэн Guernsey улсад 43 дахь жилдээ зохиогдсон олон улсын эрэгтэйчүүдийн тэмцээнд оролцож Шведийн алдарт шатарчин, Их мастер Хилларп Тигертэй хайнцан, хүрэл медаль хүртэж улмаар олон улсын чансаагаа өсгөж эх орныхоо нэр хүндийг оюун ухаанаа уралдуулж өндөрт өргөн, амжилттай явж байна. Европ тивд шатар их хөгжсөн бөгөөд оюунлаг бүхнийг өндрөөр үнэлж сурсан газар байдаг тул их мастер А.Энхтуул дараагийн тэмцээндээ урилгаар оролцох боломж бүрджээ. Дашрамд дурдахад Их мастер А.Энхтуул маань дандаа эрэгтэйчүүдийн олон улсын тэмцээнүүдэд оролцож байгааг сануулахад бахархалтай байна. Арван тавхан насандаа төрийн дээд шагнал \”Алтангадас\” одонгоор шагнуулж байсан ОУ-ын шатрын Их мастер А.Энхтуулдаа эх орныоо оюунлаг төрхөөр дэлхийд сурталчилж буй их ажлын замналд нь сайн, сайхныг хүсье! Монголчууд бид хүний нутагт ганцаараа их зорилгынхоо төлөө тууштай яваа шатарчин охиндоо урам зориг хайрлан, дэмжицгээе!