ХДХВ-ыг эмчлэх боломжтой

ХДХВ, ДОХ-ын асуудалд анхаарлаа
хандуулах олон улсын өдөр өнөөдөр
тохиож байна. Дэлхийн улс орнууд энэ жил \”Би сэргийлж чадна – Харин та, Бид сэргийлж чадна – Харин та” гэсэн урианд нэгдэж
байгаа аж. Энэхүү өдрийг угтаж Халдварт
өвчин судлалын үндэсний төвийн эмч, мэргэжилтнүүд сэтгүүлчдэд мэдээлэл хийсэн юм.

 

ХДХВ-ЫН ХАЛДВАР АВСАН НИЙТ ХҮМҮҮСИЙН 50 ХУВЬ НЬ ГЭР БҮЛТЭЙ
ХҮМҮҮС БАЙНА

 

Иргэдийн дунд ХДХВ/ДОХ гэдэг
бол үхэлд хүргэх аюултай, ямар ч эмчилгээгүй өвчин гэсэн ойлголт байдаг. Энэ талаар тандалт судалгааны эмч П.Түмэндэмбэрэл тайлбарлахдаа \”ХДХВ бол элэгний В,С вирустай
адил вирусын гаралтай өвчин юм. Вирусын халдвар авсан хүн түүнийгээ насан
туршдаа биедээ тээж явдаг. Тэгэхээр энэ вирусын халдварыг ДОХ болохоос өмнө эрт
илрүүлэх тусам эмчлэгдэх боломжтой гэж ойлгож болно. Удахгүй ХДХВ болон ДОХ-ын эмнэлзүйд тэсрэлт бий болно гэж итгэж
байгаа. Монгол улсад анх 1992 онд
ХДХВ-ын халдвар авсан тохиолдол илэрч байсан. Тэр хүн өнөөдөр ч эрүүл саруул, үр удмаа үлдээгээд амьдарч явна. Мөн
энэ хугацаанд ХДХВ-ын халдвартай 13 ээжээс 19 хүүхэд төрж, эрүүл саруулж бойжиж
байна” гэв.

Он гарсаар манай улсад ХДХВ-ын
халдвар авсан 24 хүн шинээр илэрч, таван хүн нас баржээ. Энэхүү өвчнөөс урьдчилан
сэргийлэхийн тулд тохиолдлын бэлгийн хавьтлыг тэвчих хэрэгтэй. Эцэг эхчүүд
хүүхдүүдтэйгээ энэ талаар нээлттэй ярилцдаг болох хэрэгтэй. Өнгөрөгч онд
ХДХВ-ын халдвар авсан нийт хүний 50 хувь нь гэр бүлтэй хүмүүс байсан. Үүнээс
гадна жирэмсний сүүлийн сард тэмбүүгийн халдвар авсан жирэмсэн эмэгтэйчүүдийн
тоо нэмэгдсээр байна. Энэ бол аавуудын хариуцлагагүй байдлаас үүдэлтэй өвчлөл
юм. Тиймээс гэр бүлдээ үнэнч байх хэрэгтэй.
Мөн бэлгэвчний хугацааг харж, тогтмол, зөв хэрэглэж дадах хэрэгтэй гэдгийг эмч нар зөвлөж байна.

 

ТӨРӨЛХИЙН БЭЛГИЙН ЗАМЫН ХАЛДВАРТ ӨВЧТЭЙ ХҮҮХЭД ТӨРЖ БАЙНА

2030 он гэхэд ХДХВ/ДОХ эрүүл
мэндийн тулгамдсан асуудал биш болно. Үүний тулд дэлхий нийтээр 3х90 гэсэн
зорилго тавин ажиллаж байгаа аж.
Тодруулбал, ХДХВ-ын халдвар авсан байх магадлалтай эрсдэлт бүлгийн 90 хувийг
илрүүлэх, ХДХВ-ын халдвартай иргэдийн 90 хувийг ретровирусын эсрэг эмчилгээнд
хамруулах, эмчилгээний үр дүнг 90 хувьд хүргэхийг зорьж байгаа юм байна. Өнөөдрийн байдлаар манай
улсад ХДХВ-ын халдвар авсан 249 хүн байгаа бөгөөд тэдний 50 хувь нь эмчилгээнд
хамрагдаж байгаа. ХДХВ-ын халдвар авсан
нийт иргэдийн 80 хувийг бэлгийн цөөнх буюу гей залуус эзэлдэг. Манай улсад өнөөдөр нийтдээ 85 цэгт ХДХВ-ын шинжилгээ хийгдэж
байгаа боловч ХДХВ-ын халдвар авсан байх магадлалтай эрсдэлт бүлгийнхэн үүнд
хамрагдахгүй байна.

Мөн бэлгийн замын халдварт
өвчинтэй тэмцэхэд олон асуудал тулгамдаж байгаа. Тухайлбал, Манайд бэлгийн замын дархлал хомсдолын хавьтал
судлаачийг орон тоогоор нь ажиллуулах, хавьтлыг илрүүлэх өвөрмөц аргуудыг
хэрэглэх шаардлагатай байна. Жирэмсний хяналтын чанар хангалтгүйгээс төрөлхийн
бэлгийн замын халдварт өвчинтэй хүүхэд төрж байна. Бэлгийн замын дархлал
хомсдолын төрөлжсөн нарийн мэргэжлийн эмч, эмнэлгийн мэргэжилтнийг сургаж,
бэлтгэх, аймаг, дүүрэг дэх лабораторийн чадавхыг сайжруулах, ЕБС-ийн сурагчдад
эрүүл мэндийн боловсрол олгох цагийн багтаамжийг нэмж оруулах шаардлагатай
байгааг Халдварт өвчин судлалын үндэсний төвийн эмч, мэргэжилтнүүд онцоллоо.