![\"\"](http://undesten.mn/wp-content/uploads/2017/12/1512702215_-15092016-1473914183-1529704459-erdenet.jpg "\\"\\"")
Монгол Улсын Дээд шүүхийн Хяналтын шатны иргэний хэргийн шүүх хуралдаанаар \”Монголиан коппер корпорейшн” ХХК-ийн нэхэмжлэлтэй иргэний хэргийг хянан хэлэлцэв. Улмаар \”Эрдэнэт үйлдвэр” ХХК-ийн хувьцаа эзэмшигчдийн 2017 оны гуравдугаар сарын 31-ний өдрийн ээлжит бус хурал, уг хурлаас гаргасан \”Компанийн дүрмийн зарим заалтыг өөрчлөх тухай” 01 тоот тогтоол, \”Төлөөлөн удирдах зөвлөлийн гишүүдийг чөлөөлөх, томилох тухай” 02 тоот тогтоолыг тус тус хүчингүй болгосон байна. Мөн \”Монголиан коппер корпорейшн” ХХК-ийн зүгээс шүүхэд гаргасан \”Эрдэнэт үйлдвэр” ХХК-ийн ээлжит бус хурлын 2016 оны арваннэгдүгээр сарын 2-ны өдрийн 06/2016 тоот \”Төлөөлөн удирдах зөвлөлийн гишүүдийг чөлөөлөх, томилох тухай” тогтоолыг хүчинтэй хэвээр болохыг тогтоолгох”-ыг хүссэн нэхэмжлэлийг хэрэгсэхгүй болгожээ.
Ингэснээр \”Эрдэнэт үйлдвэр\” ХХК өчигдрөөс эхлэн Төлөөлөн удирдах зөвлөлгүй болж байна. Энгийнээр тайлбарлавал 51 хувийг эзэмшигч Монголын төрийн томилсон ТУЗ-ийн үйл ажиллагааг хүчингүй болгож, 49 хувийг эзэмшигч \”Монголын зэс\” компанийнхантай учраа олох шаардлагатай боллоо.
\”Эрдэнэт үйлдвэр” ХХК-ийн ээлжит бус хурлын 2016 оны арваннэгдүгээр сарын 2-ны өдрийн 06/2016 тоот \”Төлөөлөн удирдах зөвлөлийн гишүүдийг чөлөөлөх, томилох тухай” тогтоолоор тус үйлдвэрийн ТУЗ-ийг долоон хүний бүрэлдэхүүнтэй тогтоосон аж. ТУЗ-д 51 хувь буюу Засгийн газрыг төлөөлж Засгийн газрын хэрэг эрхлэх газрын дэд дарга У.Бямбасүрэн, Уул уурхай, хүнд үйлдвэрийн яамны төрийн нарийн бичгийн дарга Г.Нандинжаргал, Сангийн яамны нягтлан бодох бүртгэлийн газрын дарга Б.Доржсэмбэд, УИХ-ын гишүүн асан Д.Дэмбэрэл нарыг томилсон. Харин 49 хувийг эзэмшигч \”Монголиан коппер корпорейшн”ХХК-ийн талаас \”Эрдэнэс-оюутолгой” компанийн гүйцэтгэх захирал асан Д.Ганболд, Худалдаа хөгжлийн банкны гүйцэтгэх захирал О.Орхон, \”Монгол зэс” корпорацын ТУЗ-ийн дарга М.Мөнхбаатар нар сонгогдоод байсан юм. Гэвч Дээд шүүх 06/2016 тоот тогтоолыг хүчингүй болгосноор У.Бямбасүрэн даргатай \”Эрдэнэт үйлдвэр” ХХК-ийн ТУЗ тарлаа. Одоо Монголын төрийн саалийн үнээ гэгдэх Эрдэнэт үйлдвэр ТУЗ-гүйгээр үйл ажиллагаагаа явуулж байна. Тиймээс яаралтай ээлжит бус хурлыг зарлаж, шинэ ТУЗ-ийг томилох шаардлага тулгарлаа.
![\"\"](http://undesten.mn/wp-content/uploads/2017/12/1512702145_undesten.png "\\"\\"")
