Ерөнхийлөгч асашёорү Д.Дагвадоржийг Элчин сайд болгох гэж шахаж эхлэв

 

 

  Монгол Улсын Ерөнхийлөгч Х.Баттулга өнгөрсөн долоо хоногт зарим улсад суух элчин сайдын нэрсийг баталгаажуулах боломжгүй гэж үзсэн билээ. 2017 оны 05 сарын 25-ний өдрийн УИХ-ын хуралдаанаар дэмжигдэж, элчин сайдаар томилуулах шийдвэрийг Их хурлаас гаргуулсан гурван эрхмийн нэрийг Ерөнхийлөгч Х.Баттулга буцаасан юм.

Тухайлбал эхнийх нь АНУ-д суух элчин сайд Ё.Отгонбаяр. Түүний хувьд одоогоор БСШУС-ын дэд сайдаар ажиллаж байгаа. Мөн Япон улсад суух элчин сайдад  Г.Тэнгэрийн нэр яригдаж байгаа. Тэрээр өмнө нь Гадаад харилцааны дэд сайдаар ажиллаж байсан туршлагатай. Мөн Канад улсад суух элчин сайдаар Н.Чингүүндарь. Н.Чингүндарь өмнө нь Гадаад харилцааны яаманд анхан болон дунд шатанд ажиллаж байсан бөгөөд УИХ-ын гишүүн Н.Оюундарийн төрсөн дүү юм байна. Түүнийг мэдлэг чадвартай залуу боловсон хүчин хэмээн МАН-ынхан үнэлдэг аж. Энэ 3 хүний нэрийг өмнөх засгийн газар буюу Ж.Эрдэнэбатын Засгийн газрын үед УИХ-д өргөн барьж  элчин сайдаар томилох боломжтой хэмээн үзэж шийдвэр гаргасан.  

Харин Ерөнхийлөгч энэ 3 эрхмийг 7 сар хүлээлгэж, луу унжсаны эцэст элчин сайдаар томилох боломжгүй хэмээн Засгийн газарт буцаагаад байна.

Зарим эх сурвалжаас авсан мэдээгээр бол дээрх 3 эрхмийг буцаасан хамгийн том шалтгаан нь Япон улсад суух элчин сайдын асуудал гэнэ. Ерөнхийлөгчийн хувьд Засгийн газраас санал болгосон Г.Тэнгэрийн оронд өөрийнх нь сонгуульд хүчтэй дэмжлэг үзүүлсэн Мэргэжлийн сумогийн их аварга Д.Дагвадоржийг элчин сайд болгох  томоохон сонирхол байгаа гэнэ. Тэрээр ийм тохиролцоог одоогийн Засгийн газрын тэргүүн У.Хүрэлсүхтэй хийхийн тулд МАН-ын төлөөлөл болсон 3 хүний нэрийг буцаасан гэх мэдээлэл дуулдаж байна.

Д.Дагвадоржийн хувьд Ерөнхийлөгчөөс шууд дэмжлэг авч байгаа сурагтай. Харин эрх баригч МАН-аас бол тэрээр сайд ахаасаа дэмжлэг авна гэсэн тооцоог хийж яваа гэнэ. Түүний төрсөн ах Д.Сумьяабазар нь УИХ-ын гишүүн, Уул уурхай, хүнд үйлдвэрийн сайдаар томилогдоод удаагүй байгаа.  Д.Сумьяабазар нь Нийслэлийн МАН-д томоохон нэр нөлөөтэй нэгэн бөгөөд нөгөө талаараа МАН-ын дарга, Ерөнхий сайд У.Хүрэлсүхийн итгэл бүхий хүн  аж. Энэ утгаараа ийм тохиролцоо хийгдэж, Д.Дагвадорж Монгол Улсыг төлөөлөн Япон улсад суух элчин сайд болох магадлалтай  байж болзошгүй байна.

Ерөнхийлөгчийн татгалзсан 3 хүний нэрээс ямартай ч ийнхүү Г.Тэнгэр гэдэг залуугийн нэр хасагдах нь бараг тодорхой болж магадгүй гэнэ. Түүнчлэн Канад улсад суух элчин сайдад нэр дэвшсэн Н.Чингүүндарийн нэр  ч хасагдах бололтой. Түүний оронд У.Хүрэлсүх өөрийн хүнийг дэвшүүлэх юм байх. Харин Ё.Отгонбаярын нэрийг дахин оруулж ирэх магадлалтай гэдгийг зарим эх сурвалж хэлж байгаа юм.

 

 

 

Ж.Бат