Д.Хаянхярваа: Ахуйн зориулалтаар түүхий нүүрс оруулж ирэхийг хориглохоор боллоо

 

 

УИХ дахь МАН-ын бүлэг хуралдаанаараа агаарын бохирдлын эсрэг авах арга хэмжээний талаар хэлэлцжээ. 

Мэдээллийн эхэнд УИХ дахь МАН-ын бүлгийн дарга Д.Хаянхярваа \”Ахуйн зориулалтаар түүхий нүүрс оруулж ирэхийг 2019 оны дөрөвдүгээр сарын 1-нээс хориглохоор боллоо. Иймд боловсруулсан түлшний үйлдвэр байгуулах санаачилгыг Засгийн газар дэмжиж ажиллана. Мөн УИХ дахь МАН-ын бүлэг \”Амьдралыг тэтгэгч цэвэр агаар” санаачилга гаргаж, хөрсний бохирдол, агаарын бохирдолтой тэмцэх цогц арга хэмжээг авч хэрэгжүүнэ” гэв.

Мөн Д.Оюунхорол гишүүн мэдээлэлдээ \”Түүхий нүүрсийг орлох стандартын шаардлага хангасан сайжруулсан түлшийг хангалттай хэмжээнд үйлдвэрлэх ёстой гэдэгт санал нэгдсэн. Түүнчлэн гэр хорооллыг орон сууцжуулах ажлыг үе шаттай хэрэгжүүлье гэдэг ажлыг төвлөрч ярьж байна. Хашаандаа дэд бүтцээ татуулаад орон сууцанд байгаа юм шиг тав тухтай амьдрах боломжийг бий болгохын тулд дэд бүтцийн төвүүдийг байгуулахаар судалж байна.\” гэлээ.

Мэдээллийн дараа бүлгийн дарга Д.Хаянхярваа сэтгүүлчдийн асуултад хариулт өгсөн юм. 

-Орон суцны урьдчилгааг 20 хувь болгохоор ярьж байгаа гэсэн. Энэ талаар бүлэг ярьсан уу?

-Энэ талаар яриагүй.

-БНСУ-аас авч байгаа 500 сая ам.долларыг юунд зарцуулах вэ? 

-БНСУ-аас авах 500 сая ам.долларын хөгжлийн зээлийг агаарын бохирдлыг бууруулахад ялангуяа орон сууцжуулахад зарцуулахад чиглэгдэнэ.

-Зуух тараах нь гэх шүүмжлэл нийгэмд гарч байна. Үүнд тайлбар өгөөч?

-Зуух агаарын бохирдлыг бууруулах чиглэлээр өмнө хэрэгжсэн төслүүдийг бүдгэрүүлж байна. Гэхдээ зуух үр дүнгүй байгаагүй. Нүүдэлчдийн соёл иргэншилтэй зуух холбоотой. Энэ асуудлыг нарийвчлан судалж үзнэ. Бүх айлыг зуухгүй болгоно гэвэл эрт байна. Засгийн газар агаарын бохирдлын эсрэг эцсийн хувилбараа тодорхой гаргаж, танилцуулна. 

-Сайжруулсан түлш илчгүй байдаг гэсэн. Үүнийг хэрхэн шийдэх вэ?

-2019 оны дөрөвдүгээр сарын 1-нээс түүхий нүүрс оруулахгүй. Тэгэхээр сайжруулсан түлшийг нэг стандарттай болгох ёстой. Дулааны 3, 4 цахилгаан станцын хүчин чадлыг нэмэгдүүлэх чиглэлээр БНСУ-ын талтай Ерөнхий сайд ярьсан юм билээ. Энэ талаар үе шаттайгаар хийнэ. Түлштэй холбоотой асуудал бизнес болоод өнгөрөхгүй гэдэгт итгэлтэй байж болно. Ахуйн зориулалтаар нүүрс оруулахгүй гэвэл сайжруулсан түлшнийхээ хангалтыг сайжруулах ёстой.

-Татварын нэмэгдэлтэй холбоотой асуудалд бүлэг ямар байр суурьтай байна вэ?

-Эргэж авч үзнэ гэдгээ Засгийн газар хэлсэн. Нэгдүгээр сарын 25-нд ОУВС-гийн төлөөлөл манай улсад ирнэ. Энэ Засгийн газрыг огцруулах тухай асуудлыг манай намын бүлгээс ярьж байна гэх цуу яриа явж байгаа. Бид Засгийн газраа тогтвортой ажиллуулах тал дээр хатуу байр суурьтай ажиллаж, бүх талаас нь анхаарна.