Аюулгүй байдлыг хангах шинэ төлөвлөгөөнийхөө хүрээнд Австралийн хамгийн том цэнгэлдэх хүрээлэн Melbourne Cricket Ground (MCG) нь томоохон арга хэмжээнүүдийн үеэр зогсоолд автомашин тавихыг хориглохоор болжээ. Энэхүү шийдвэр нь арга хэмжээний үеэр цугласан олон нийтийн дунд автомашинтай халдлага гарахаас сэргийлэх зорилготой гэж хүрээлэнгийн удирдлагууд мэдэгдсэн байна.
Өнгөрсөн онд Мелбурн хотод энэ төрлийн халдлага хоёр ч удаа гарч, долоон хүний аминд хүрсэн билээ. Мөн дээрхтэй адил хэрэг дэлхийн олон хотод гарч, маш их гарз хохирол авчирсан юм. Тиймээс MCG-ийн зүгээс дээрх хоригийг тавьж эхэлжээ. Хүрээлэнгийн гүйцэтгэх захирал Стюарт Фокс “Дэлхий дахинд болж байгаа харамсалтай явдлууд бидэнд ч бас тохиолдож байна. Тиймээс ялангуяа цэнгэлдэх хүрээлэнгийн гадна талд олон хүн цугласан газарт автомашин болон явган зорчигч хоорондын эрсдэлийг багасгах хэрэгтэй байна” хэмээн мэдэгдэлдээ дурджээ. Үзэгчдийг хүрээлэн рүү явахдаа галт тэрэг, автобус, трамвайгаар явж байхыг эрх баригчид уриалсан байна. Австралийн засгийн газар олон нийт цугласан газруудад аюулгүй байдлыг хангаж, халдлага гарахаас сэргийлэх бодлого хэрэгжүүлэхийн тулд уг шийдвэрийг гаргажээ.
100 мянган үзэгчийн суудалтай тус хүрээлэн ирэх 12 дугаар сард болох крикетийн дөрөв дэх тэмцээн “Ashes Test”-ийн үеэр тавих хоригийг ийнхүү туршиж, хэрэгжүүлж эхэлсэн байна. Жолооч нар жижиг арга хэмжээнүүдийн үеэр автомашинаа зогсоолд тавьж болох ч одоогийнхоос илүү чанга хяналтан дор байрлуулах аж.
Б.Болормаа
