АНУ-ын ерөнхийлөгч Дональд Трамп мягмар гаригт өөрийн твиттерт Сингапурын дээд хэмжээний уулзалтын үеэр Ким Чен Ын-д үзүүлсэн бичлэгээ тавьж, ““Түүхийн нэг боломж” бичлэгээ би Сингапурын дээд хэмжээний уулзалтын үеэр БНАСАУ-ын тэргүүн Ким Чен Ынд үзүүлсэн” хэмээн жиргэжээ.
Өмнө нь АНУ-ын ерөнхийлөгч Хойд Солонгосын тэргүүнд ирээдүйн БНАСАУ ямар болох талаар, үйлдвэр үл хөдлөх хөрөнгө энэ оронд хэрхэн хөгжих талаар iPad дээр бичлэг үзүүлсэн тухай ярьж байсан билээ.
Бичлэг ердөө дөрвөн минут бөгөөд уран дүрслэлээр орчин үеийн цэцэглэн хөгжилт, Хойд Солонгосын авсан зургийг хар–цагаанаар оруулсан байлаа. Бичлэгт “Ирээдүй өнгөрсөнтэй зууралдахгүй. Харанхуйгаас гэрэл гэгээ ирнэ. Итгэлийн энэ гэрэл гэгээ илүү хурц гэрэлтэх болно.” гэж тайлбарлаж байна. Түүнчлэн түүхийн явцыг өөрчилж ямар нэг зүйлийн мэдээж сайн сайхны эхлэлийг тавьж чаддаг удирдагч байдаг талаар ярьжээ. Дэлгэц дээр Трамп болон Ким Чен Ын нарыг үзүүлж, “Хоёр удирдагч-нэг хувь заяа” хэмээн тайлбарлаж байв.
“Түүх дахин давтагдахгүй боломжийг хүнд олгож байхад – тэр юуг сонгох вэ? Магадгүй хоёрхон гарц байж болох юм. Нэг бол “арагшаа ухрах” гэж тайлбарлахад дэлгэц дээр хар-цагаанаар БНАСАУ-ын дэлгүүрүүдийн хоосон лангуу, пуужин хөөргөлт болон Америкийн онгоц тээвэрлэгчдийг үзүүлж байна.
“Эсвэл өөрөөр- урагшаа тэмүүлэх. Өнөөдөр энх тайвныг шинээр эхэлж болно- дэлхийн энх тайван, хүндлэл, эрх чөлөө” гэсэн дуу хоолой үргэлжлэв. Тэгээд бичлэг дахин өнгөтэй болж төсөөлөн байгаа ирээдүйд байж болох БНАСАУ-ын дэд бүтцийн хөгжлийг жирэлзүүлэн харуулж, дэлхийн өнцөг бүрээс тус оронд хөрөнгө оруулах боломжийн талаар өгүүлжээ.
Хэдийгээр Трамп болон Ким Чен Ын нарыг ижилхэн харуулж байгаа боловч үнэндээ Хойд Солонгосын тэргүүнд хаягласан байлаа.
“Өөрийн эх орны эрх ашгийн төлөө, дэлхийн нэг хэсэг байхын төлөө, өөрийн ард түмэндээ баатар нь байхын тулд, өөрийн эх орноо дэвшин хөгжүүлэх эрх ашгийн төлөө энэ удирдагч ямар сонголт хийх вэ? Дэлхийн сунгасан гарыг атгах уу, урьд өмнө нь хэзээ ч үзэж байгаагүй цэцэглэн хөгжилтөөс баяр баясгаланг авах уу? Агуу амьдрал, эсвэл ганцаарчилсан тусгаарлалт. Ямар замыг тэр сонгох вэ?” гэж бичлэгт асууж байна.
Ийнхүү АНУ болон БНАСАУ-ын түүхэнд анх удаа Америкийн ерөнхийлөгч Дональд Трамп, Хойд Солонгосын тэргүүн Ким Чен Ын нар зургадугаар сарын 12-д Сингапурт дээд хэмжээнд уулзлаа. Улсын удирдагч нарын уулзалт Сингапураас нэг гүүрээр тусгаарлагдсан Сентоза арал дээрх “Капелла- зочид буудалд болсон юм.
Уулзалтын үр дүнгээр Трамп “тодорхой” баримт бичигт БНАСАУ-ын тэргүүнтэй гарын үсэг зурсан, Солонгосын хойгт ”ойрын хугацаанд” цөмийн зэвсгээс ангижрах ажиллагаа эхэлнэ гэж мэдэгдлээ. Ким Чен Ын улсын тэргүүн байх хугацаандаа Сингапурт Трамптай гарын үсэг зуралцсан баримт бичиг нь хоёр орны хувьд “шинэ гараа” боллоо, тэгээд ирээдүйд ”ихээхэн өөрчлөлт хийнэ” гэж тэрээр амласан юм.
Ц.Пүрэвдорж
