Жижиг дунд үйлдвэрлэлийг дэмжих сангаас эрх мэдэл албан тушаалаа ашиглан зээл авсан гишүүдийн дуулиан үргэлжилсээр байна. Саяхнаас зээл авсан гишүүдийн тоо нэгээр нэмэгдэж байгаа тухай эх сурвалжууд мэдээлж эхэлжээ.
Тэр бол УИХ-ын 36 дугаар тойрог буюу Ховд аймгаас сонгогдсон О.Батнасан гишүүн юм. Зарим нь ийм гишүүн байдаг юм уу гэж асуух нь бий. Өөрөөр хэлбэл түүний хувьд дэлгэцийн өмнө тун ховорхон үзэгддэг гишүүдийн нэг юм.
О.Батнасан гишүүн өөрийн хамаарал бүхий “Топкондитор” ХХК-д 2018 оны зургадугаар сард 950 сая төгрөгийн зээл авч өгчөө. “Топкондитер” компанийг түүний төрсөн дүү О.Ганбаатарын үүсгэн байгуулсан, гэхдээ эзэмшигч нь О.Батнасан өөрөө гэдгийг хэд хэдэн баримтуудаас харж болно. Тухайлбал, О.Батнасан УИХ-ын гишүүн болохоосоо өмнө Топкондитер компанийн Ерөнхий захирлаар ажиллаж байсан гэдгийг түүний намтраас харж болно.
Олон жил тус компанийг удирджээ. Харин гишүүн сэтгүүлчийн асуултанд “Миний дүүгийн компани зээл авчихсан юм билээ” гэж мэдэн будилж хариулсан байгаа юм.
Гэвч Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 3.1.5-д “Хамаарал бүхий этгээд” гэж тухайн нийтийн албан тушаалтны эцэг, эх, төрсөн ах, эгч, дүү, гэр бүлийн гишүүн, хамтран амьдрагч, эхнэр /нөхөр/-ийн эцэг, эх, төрсөн ах, эгч, дүү, бусад нэгдмэл сонирхолтой этгээдийг хэлнэ” гэж заасан байдаг. Тэгэхээр О.Батнасан гишүүн яаж ч мэдэн будилсан Топкондитор компани түүний хамаарал бүхий болж таарч байна.
Олон нийт эрх мэдэл албан тушаалын давуу байдлаа ашиглаж бага хүүтэй зээл авсан эдгээр гишүүдийн үйлдлийг “хулгай”-тай зүйрлэн, буруутгаж байгаа. Буруутгахаас ч аргагүй. Жижиг дунд үйлдвэрлэл эрхлэхээр хүсэлт гаргасан олон мянган иргэний өмнүүр өөрийн эрх мэдэл, албан тушаалаа ашиглан орж зээл авсан энэ үйлдлийг яавч өөгшүүлж, зөвтгөх аргагүй юм.
