Энэ жил Олон улсын хөдөлмөрийн байгууллагын 100 жил, хөдөлмөрийн асуудал хариуцсан төрийн захиргааны байгууллага бие даан байгуулагдсаны 60 жилийн ой тохиож байгаа билээ. Ойн хүрээнд өнөөдөр буюу дөрөвдүгээр сарын 30-нд ХНХЯ, түүний харьяа байгууллагууд болон нийслэлийн төвийн зургаан дүүргийн салбарын байгууллагууд Сүхбаатарын талбайд, 21 аймаг, нийслэлийн алслагдсан гурван дүүрэг өөр өөрийн нутаг дэвсгэрт нэгэн зэрэг “Нээлттэй хаалганы өдөрлөг”-ийг зохион байгуулж байна.
Энэ онд 100 жилийнхээ ойтой золгож буй, 187 улсыг эгнээндээ нэгтгэсэн Олон улсын хөдөлмөрийн байгууллагад Монгол Улс 1968 онд элссэн. Гишүүн орны хувьд Монгол Улс өнгөрсөн 50 жилийн хугацаанд тус байгууллагын 20 конвенцид нэгдсэн байдаг юм.
Мөн энэ онд Монгол Улсад хөдөлмөрийн асуудал хариуцсан төрийн захиргааны бие даасан байгууллага бий болсны 60 жилийн ой тохиож байгаа юм. 1959 оны тавдугаар сарын 20-нд тухайн үеийн Сайд нарын Зөвлөлийн 199/189 дүгээр тогтоолоор Хөдөлмөр, цалин хөлсний товчоо гэж байгуулсан нь Монгол Улсад хөдөлмөрийн асуудал эрхэлсэн төрийн захиргааны байгууллагын үндэс суурь гэж үздэг.
Эдгээр түүхэн ойг тэмдэглэх хүрээнд ХНХЯ-наас иргэд, олон нийтэд чиглэсэн хэд хэдэн томоохон арга хэмжээг зохион байгуулахаар төлөвлөсний нэг нь энэхүү “Нээлттэй хаалганы өдөрлөг” гэдгийг ХНХЯ-ны Төрийн нарийн бичгийн дарга Г.Өнөрбаяр онцлосон юм.
Өдөрлөгт Хөдөлмөр, нийгмийн хамгааллын яам, Хөдөлмөр, халамжийн үйлчилгээний ерөнхий газар, Нийгмийн даатгалын ерөнхий газар, Гэр бүл, хүүхэд, залуучуудын хөгжлийн газар, Хөгжлийн бэрхшээлтэй хүний хөгжлийн ерөнхий газар, Хөдөлмөрийн аюулгүй байдал, эрүүл мэндийн төв, Хөдөлмөр, нийгмийн хамгааллын судалгааны инситут, Мэргэжлийн боловрол, сургалтын үнэлгээний төв, Олон улсын хүүхдийн “Найрамдал” цогцолбор, “Өнөр бүл” хүүхдийн төв, Сэргээн засалт, сургалт үйлдвэрлэлийн төв, Ахмад настны үндэсний төв болон тус яамны харъяа аймаг, нийслэл, дүүргийн газар, хэлтсүүд, мэргэжлийн боловсрол, сургалтын байгууллагуудаас гадна ОУХБ, Цагдаагийн ерөнхий газар, хөдөлмөрийн хувийн биржүүд, аж ахуйн нэгжүүд, бичил бизнес эрхлэгчид зэрэг 120 гаруй төрийн болон төрийн бус байгууллагын төлөөлөл оролцож байна. 
Мөн ажлын байрны санал бүхий 60 томоохон ажил олгогч, 10 хөдөлмөрийн хувийн бирж оролцож ажил зуучлах үйлчилгээ үзүүлж байгаагаас гадна хөдөлмөр эрхлэлт, нийгмийн даатгал, халамж, хүүхэд хамгаалал, залуучуудын хөгжил, ахмад настны чиглэлээр үйл ажиллагаа явуулдаг төрийн байгууллагууд иргэдийн санал бодлыг сонсох уулзалт зохион байгуулж, иргэдэд нэг цонхны үйлчилгээгээр зөвлөгөө, лавлагаа өгөх, иргэдийн санал хүсэлтийг газар дээр нь шийдвэрлэж өгч байгаа юм.
