Дэлхийн орчин үеийн урлагийн олимп хэмээгддэг Венецийн олон улсын урлагийн үзэсгэлэнд оролцож буй Монгол Улсын павилионы нээлт 5 дугаар сарын 8-ны өдөр болжээ. Венец хотын “Арсеналь” үзэсгэлэнгийн бүсэд зохион байгуулагдаж буй энэхүү үзэсгэлэн дэх монгол улсын павилионыг Монгол Улсаас Бүгд Найрамдах Итали Улсад суугаа Онц бөгөөд Бүрэн Эрхт Элчин Сайд Ц.Жамбалдорж албан ёсоор нээж үг хэлэв.
Венец хотноо 19 дүгээр зууны сүүлээс эхлэн хоёр жил тутамд зохиогдож ирсэн энэхүү үзэсгэлэнд манай улс 2015 оноос оролцож эхэлсэн юм. “Сонирхолтой цаг үед амьдрах болтугай” гэсэн сэдвийн дор зохион байгуулагдаж буй Венецийн 58 дугаар олон улсын урлагийн үзэсгэлэнд Монгол Улс уран бүтээлч Э.Жанцанхоролын “Агшин зуур” хэмээх орон зайн барималуудыг хөөмийн дуу авиатай хоршуулан абстракт дуу авиа гаргах онцлог уран бүтээлээр оролцож байна. Энэхүү дуу авианы куратороор Германы уран бүтээлч Карстен Николой ажиллаж байна.
Венецийн Биенналийн үзэсгэлэнд дэлхийн 100 гаруй орны үзэсгэлэнгийн танхим ажиллаж байгаа бөгөөд 5 дугаар сарын 11-нээс 11 дүгээр сарын 24-ний өдөр хүртэл үргэлжилнэ.
Венецийн Биенналийн үзэсгэлэнд оролцож буй Монгол улс нээлтээ хийлээ
}
Шинэ мэдээ
