Монгол Улсын гавъяат дасгалжуулагч, Улсын арслан Бандийн Ганбаатарын Хүрэл хөшөөний цогцолбор, спорт заалыг түүний төрсөн нутаг Өвөрхангай аймгийн Баян-Өндөр суманд байгууллаа.
Бүтээн байгуулалтын нээлтийн үйл ажиллагааг Улаанбаатар хот дахь аймгийн болон сумын Нутгийн зөвлөл, “Бумбат” үндэсний бөхийн холбоо хамтран наймдугаар сарын 4-нд зохион байгуулсан байна.
Энэ үеэр хүчит 64 бөхийн барилдаан, хурдан морьдын уралдаан, шагайн харваан тэмцээн болсон бөгөөд УИХ-ын гишүүн, НХХ-ын сайд С.Чинзориг, аймгийн Засаг дарга Г.Ганболд, Монгол Улсын гавъяат дасгалжуулагч, Улсын арслан Б.Ганбаатар, түүний хадам аав Улсын заан Д.Лхагвасүрэн, Улсын арслан Д.Ганхуяг, Улсын гарьд Ш.Доржсамбуу зэрэг нэр бүхий хүмүүс, нутгийн ард иргэд оролцов.
Хөшөөг тус сумын үндэсний бөхийн “Бумбат” дэвжээний санаачилгаар байгуулж, бөхөд хайртай олон түмний хандив, тусламжаар босгосон байна.
Спорт заалыг барихад улсын төсвөөс 900 орчим сая төгрөгийг зарцуулсан бөгөөд Аймгийн ИТХ-ын 33 дугаар тогтоолоор спорт заалыг Б.Ганбаатар арслангийн нэрэмжит болгосон юм.
Улсын арслан Б.Ганбаатар 1980 оны улсын баяр наадамд Ч.Өвгөнхүү начинаар тав давж улсын начин цолыг 22 насандаа хүртсэн бол 1985 оны улсын баяр наадамд ес даван түрүүлж Монгол улсын арслан цол хүртсэн билээ.
Улсын арслан Б.Ганбаатарын хүрэл хөшөөг босголоо
}
Шинэ мэдээ
