Тэд хүсэлтдээ
“ГБХНХ-ын сайд Т.Аубакир, УИХ-ын гишүүн, ХХААН-ны байнгын хорооны дарга Б.Бейсен, УИХ-ын гишүүн Х.Жангабыл, С.Замира, С.Зулпхар нарт
Бид Монгол улсын баруун хязгаар, алс холын Баян-Өлгий аймгийн иргэдийн дуу хоолойг Төрийн ордонд хүргэх, орон нутгийн эрх ашгийг улс төрийн бодлогоор тууштай хамгаалж, биднийг төлөөлөөсэй гэж итгэж та бүхнийг сонгосон. Гэвч сүүлийн үед манай аймагт үүсээд буй нөхцөл байдал болон цахим орчинд өрнөж буй асуудалд нийт ард иргэд бид туйлын сэтгэл зовниж байна.
Өнөөдөр Баян-Өлгий аймагт малын гоц халдварт шүлхий өвчин гарч, 1500 гаруй мал хорогдон, малчид болон орон нутгийн иргэдийн амьжиргаанд хүнд цохилт болоод байна.
Гэтэл энэ хүнд цаг үед малын өвчлөл, иргэдийн бодит асуудалд анхаарал хандуулахын оронд УИХ-ын гишүүн М.Нарантуяа (Нара) Баян-Өлгий аймагт Консулын газар байгуулах асуудлыг далимдуулан, цахим орчинд сенсаци тарьж, казахуудыг нийтээр нь муулан, үндэстэн хоорондын хагарал үүсгэхүйц үйлдлүүдийг удаа дараа гаргаж байна.
Баян-Өлгий аймагт зуун гаруй жилийн турш Казах, Урианхай, Халх, Тува ахан дүүс нэгэн дээвэр дор, эвтэй найртай, бие биенээ хүндэтгэн аж төрж ирсэн түүхтэй. Улс төржилт болон гадаад харилцааны асуудлаас болж энгийн иргэд, тэр дундаа манай аймгийн олон угсаатны төлөөлөл цахим орчинд хэлмэгдэж, доромжлогдох ёсгүй.
Энэ бол зөвхөн нэг гишүүний амбиц биш, цаана нь Баян-Өлгий аймгийн 150,000 гаруй иргэдийн эрх ашиг, үндэсний аюулгүй байдал, дотоод эв нэгдлийн асуудал яригдаж байна.
Иймд аймгийнхаа нийт ард иргэдийн төлөөлөл болсон та бүхнээс дараах арга хэмжээг яаралтай авч өгөхийг шаардаж байна:
-Хариуцлага нэхэх, уулзах: УИХ-ын гишүүн М.Нарантуяатай нүүр тулан уулзаж, үндэстэн хооронд яс хаясан, олон нийтийг талцуулсан мэдээллээ зогсоохыг шаардах, холбогдох хууль хяналтын байгууллага болон УИХ-ын Ёс зүйн хороонд асуудлыг тавих. -Эв нэгдлийг хамгаалах: Монгол улсын бүрэн эрхт иргэд Баян-Өлгийчүүдийн нэр хүндийг хамгаалж, Төрийн индэр дээрээс бодит байдлыг тайлбарласан албан ёсны дуу хоолойг хүргэх.
Сонгогдсон гишүүд та бүхнийг энэ асуудалд хайнга хандалгүй, Баян-Өлгий аймгийн нийт ард иргэдийн эрх ашгийн төлөө яаралтай зоримог алхам хийнэ гэж бид итгэж байна” гэжээ.
