Хараагүй хүүхдүүд төсөөллийн шатар тоглож сурч байна гэв

 

  Харааны бэрхшээлтэй хүүхдийн 116-р тусгай дунд сургуулийн хараагүй хүүхдүүд
төсөөллийн шатар тоглож сурч байгаа талаар Оюуны матриц академийн удирдлагууд
өнөөдөр мэдээлэл хийлээ. Тус академийн багш Г.Нямрагчаа хэлэхдээ: \”Өнөөдөр бид
та бүхэнд төсөөллийн шатар гэх нэр томьёо, төсөөллийн шатар гэж яг юуг хэлдэг ,
үүнийг тоглож сурснаар ямар ач холбогдолтой  болон Монголд энэ спорт хэзээнээс үүссэн,
цаашид яаж хөгжих боломжтой түүний хамрах хүрээний талаар ярих гэж ирлээ. Манай
Оюуны матриц академи 2016 оноос эхлээд төсөөллийн шатар гэдэг хичээлийг сургалтын
программдаа нэвтрүүлж эхэлсэн. Төсөөллийн шатар гэдэг  маань жирийн хараатай хүүхдүүд  энгийн кирилл шатрыг тоглохдоо нүдээ боож байгаад
ой тогтоолтын аргыг ашиглан тоглодог шатрыг хэлдэг . Харин бид энэхүү төсөөлийн
шатрыг хараагүй хүүдүүдэд зааж сургахыг эрмэлзэн харааны бэрхшээлтэй хүүхдийн
116-р сургуулийн хүүхдүүдэд сургалт явуулж эхэлсэн байгаа. Мэдээж харааны
бэрхшээлтэй 116-р сургууль дээр хараагүй хүүхдүүдэд зориулсан баррель шатар буюу
тэмтэрдэг шатар гэж байдаг ч тэр нь олдоц муутай, сургуулийн хэмжээнд хоёрхон
байдаг,хараагүйчүүдийн холбоон дээрээ бас нэг байдаг юм билээ.  Шатар гэдэг бол өөрөө оюуны спорт байдаг. Аливаа
хүн шатар тоглосноор 10 нүүдлийн цаадахийг хардаг гэж манай ард түмэн эртнээс
нааш ярьсаар ирсэн. Тэгвэл огт харахгүйгээр буюу ой санамжиндаа 64 нүүдлийн
шатрыг буулгаж төсөөллийн аргаар тоглоно гэдэг бол хүний сэтгэн бодох үйл
ажиллагааг асар өндөр хөгжүүлэх үр дүнтэй үйл явц юм. Энэхүү үйл явцын давуу
талыг олж харсны үндсэн дээр бид энэхүү шатрыг Монголд хөгжүүлж зааж сургах
аргачилалыг эхлүүлээд явж байна. Ерөнхийдөө энэ чиглэлээрээ бид хараатай хүн
харахгүйгээр буюу нүдээ боогоод шатар тоглох боломжтой юм бол хараагүй хүн энэ
тоглоомыг яагаад тоглож болдоггүй юм гэсэн үндсэн дээр харааны бэрхшээлтэй
хүүхдийн 116-р сургууль дээр энэ хөтөлбөрийг хэрэгжүүлж эхэлсэн гэж хэлж болно.
Манайх 116-р сургуультай хамтарч ажилласаны хүрээнд нийтдээ 3 сарын хугацаанд 6
хараагүй хүүхдийг энэхүү шатрыг зааж сургаад байна. Сургалтанд хамрагдсан
тэдгээр хүүхдүүд төсөөлийн шатрыг бүрэн тоглож сурсан бөгөөд жирийн хараатай
хүмүүстэй хангалттай хэмжээнд шатар тоглож сурсан. Бид ирэх 2018 онд хараагүй
хүүхдүүдийн дунд  энэхүү төсөөллийн
шатрын тэмцээнийг зохион явуулхаар төлөвлөөд байна гэв.                                                                                         

 

   116-р сургуулийн 6-р ангийн сурагч Б.Цэцэнбилэг: Ер нь харааны бэрхшээлтэй
хүүхэд өөртөө итгэх итгэл тун муутай байдаг. Гэтэл энэхүү төсөөлийн шатрыг
тоглож сурснаар бидний өөртөө итгэх итгэл маш их нэмэгдсэн. Харин энгийн хүмүүс
хараагүй хүмүүс шатар тоглож байна гэхээр маш их гайхаж хүлээж авдаг. Миний
хувьд энэхүү төсөөлийн шатрыг сайн тоглож сурсан. Нөгөөтэйгүүр төсөөллийн шатар
бид нарт яагаад хэрэгтэй вэ гэхээр ой тогтоолтод сайнаар нөлөөлж, хичээл номоо
хийхэд маш сайн түлхэц болж өгдөгөөрөө давуу талтай. Хөзрийг ч гэсэн бид байршилаар
нь цээжилж сурах боломжтой болсон. Мөн хараагүй иргэд бид энгийн хүмүүст бид ч
гэсэн юм сурч  чаддаг юм шүү гэсэн
ойлголтыг төрүүлж чадсан гэж хэлж болно. Хүмүүс төсөөллийн шатар гэхээр маш  хэцүү зүйл юм шиг ойлгож  магадгүй. Хэрвээ аргыг нь сурчих юм бол төсөөлийн
шатар сурахад маш амархан. Хүн бүхэн сурах боломжтой. Энэ дашрамд хэлэхэд Оюуны
матриц академийн хамт олонд баярлалаа гэж хэлмээр байна”гэлээ.               

 Ж.Батдорж