УОК-ын Шуурхай Штабаас мэдээлэл хийж байна.
Гадаад харилцааны яамны Консулын газрын дарга Л.Мөнхтүшиг:
Гадаадаас Монгол иргэдээ татан авах үйл ажиллагааг зогсолтгүй зохион байгуулсаар байна. Төлөвлөгөөний дагуу зарим нислэгийн зөвшөөрөл албан ёсоор гарсан. Мөн бидэнд Австрали улс руу “МИАТ” ТӨХК-ийн онгоцоор тусгай үүргийн нислэг хийх боломж гарлаа.
Өмнө нь тус улс руу манай улсын иргэний агаарын тээврийн нислэг огт хийгдэж байгаагүй. Энэхүү нислэгийг зарлахгүйгээр нууцаар хийх гэж байна гэх мэдээлэл гадуур байна. Тийм зүйл байхгүй юм шүү. Австрали улсаас ирэх хүсэлтэй 1000 гаруй хүний өргөдөлийг уламжлал ёсоор Шуурхай штаб дээр нэрсийг хүлээн авч баталгаажуулж байна.
Өнөө шөнө буюу зургаадугаар сарын 6-нд нислэг үйлдэнэ. Австралид нутаг буцах хүсэлтэй 1200 хүн байгаа юм. Зөвхөн тодорхой иргэдийг нууцаар авч явах гэж байна гэх хардлагыг ор үндэсгүй гэдгийг хариуцлагатайгаар хэлье. Сиднейгээс зургаадугаар сарын 8-ны даваа гарагт ирэх тус тусгай үүргийн онгоцоор 250-270 гаруй хүн ирнэ. Нислэгийг ашиглаад буцах замдаа онгоцоо Филипин улсад цэнэглэхдээ тэнд байгаа 34 иргэнээ авна.
Ер нь 45 улсад манай улсын 11600 гаруй иргэн нутаг буцах хүсэлтээ өгсөн байгаа ба тухайн улсад нөхцөл байдал ямар байгааг харгалзан цаашид ч нэмэгдэх хандлагатай байна. АНУ, Хойд Америкт 2000 гаруй, Азид 5500 гаруй, Европод байгаа манай улсын 2600 гаруй хүн нутаг буцах хүсэлтээ ирүүлсэн, тоо шинэчлэгдэн өөрчлөгдөж байна.
Өнгөрсөн хугацаанд гадаадаас 9068 иргэнээ татан авсан ба агаараас гадна газраар ч татан авч байна.
Төлөвлөгөөт нислэгүүдийн талаар товчхон:
1. Сидней – 06.08-ны Даваа гараг
Сиднейгээс зургаадугаар сарын 8-ны даваа гарагт ирэх тус тусгай үүргийн онгоцоор 250-270 гаруй хүн ирнэ. Нислэгийг ашиглаад буцах замдаа онгоцоо Филипин улсад цэнэглэхдээ тэнд байгаа 34 иргэнээ авна.
2 Нур-Султан – 06.10-ны Лхагва гараг
Казахстан улсын иргэдийг хүргэж өгөөд буцаж ирэхдээ тус улсад байгаа өөрийн улсын 170 орчим иргэнээ татан авна.
3. Токио – 06.11-ний Пүрэв гараг
Дөрөвдүгээр сарын 8-наас хойш тус улс руу нислэг үйлдээгүй. Тэнд байгаа оюутнууд хичээл нь амарчихсан, санхүүгийн хувьд хүндрэлтэй болсон учраас татан авах шаардлагатай байна. Нутаг буцах хүсэлтэй 1400 иргэн өргөдлөө өгсөн ба үүнд хөгжлийн бэрхшээлтэй 6 иргэн байгаа юм.
4. Энэтхэг – 06.12-ны Баасан гараг
Шинэ Дэлид байгаа иргэдээ татан авч байсан бол энэ удаад 230 гаруй ламхай хүүхдүүдийг татан авна. Мөн уг онгоцоор 13 иргэнээ Лаос улсаас авна.
5. Сөүл /транзит/ – 06.17-ны Лхагва гараг
БНСУ-ын Хууль зүйн сайдын зургаадугаар сарын 3-ны өдөр гаргасан шийдвэрээр Монгол, Орос, Тайланд улсын иргэдийг транзит нислэгээр хүлээн авахгүй байхаар болжээ. Уг мэдээллийг аваад Гадаад харилцааны яам БНСУ-ын талтай ярилцахаар ажиллаж байна. Хоёр улсын Элчин сайдуудтай харилцан уулзалтууд хийсэн. Энэхүү шийдвэр нь зөвхөн Монгол улс руу чиглэсэн биш юм. Олон улсын түвшинд агаарын хилээ хаасан тус гурван улс руу дамжин нисэхдээ дараагийн нислэг нь баталгаажаагүй байхад Инчеоны онгоцны буудал дээр олон хонож, хэт их бөөгнөрөл үүсгэж байгаа учраас энэхүү арга хэмжээг авчээ. Жишээ нь гадаадын иргэн /монгол хүн биш/ халдвар тээгээд онгоцны буудалд ирсэн гэсэн мэдээлэл байна.
Уулзалтын үеэр Солонгосын талтай олон улсын нислэгээ зогсоогоогүй цөөн улсын томоохон онгоцны буудлуудын нэг нь Инчеоны нисэх онгоцны буудал гэдгийг ойлголцсон. Тиймээс АНУ-аас ирэх иргэдийн гол гарц нь тус онгоцны буудлаар дамжих болоод байгаа юм. Мөн Зүүн Өмнөд Азийн орнуудаас ирэх хүсэлтэй манай улсын 450 иргэн бий. Тайланд зургаадугаар сарын 30-ныг хүртэл агаарын хилээ хаасан. Тиймээс тус улсаар дамжих боломж одоогоор алга. Харин Инчеоны онгоцны буудлаар дамжих л боломж байгаа цаашлаад уг шийдвэр гарснаар Монгол иргэд эх орондоо ирэхэд маш том хүндрэл үүсч байгаа гэдгийг БНСУ-ын Элчин сайдад учирласан. Уг асуудлын дипломат шугамаар шийдвэрлэхээр ажиллаж байгаа ба нислэг төлөвлөлтийн дагуу хэвээрээ байгаа юм. Тиймээс иргэд тайван байхыг хүсч байна
6. Сөүл – 06.18-ны Пүрэв гараг
БНСУ-аас ирэх хүсэлтээ өгсөн 2000 гаруй хүн байгаа юм. Уг шууд нислэгт визний хугацаа нь хэтрээд саатуулагдсан иргэдээс хамруулна.
7. Франкфурт – 06.19-ний Баасан гараг
Европт байгаа иргэдээ ХБНГУ-ын Франкфуртээс татан авна. Өмнө нь тавдугаар сарын 3-нд авч байсан нь нэлээн үр дүнтэй арга байлаа. Инчеоноос 10 гаруй улсаас транзитаар зорчигч байсан бол Франкфуртээс Европт байгаа бүхий л улсаас авах боломжтой байна.
Дээрх нислэгүүдээр урьдчилсан байдлаар 2000 гаруй иргэн эх орондоо ирнэ. Найм дахь нислэг одоогоор тодорхойгүй байгаа ба судалж байна гэлээ.
