Ливаны хүн амын бараг дөрөвний нэгийг хамарч буй өлсгөлөнгийн хямралд яаралтай арга хэмжээ авахгүй бол улам даамжирч болзошгүйг НҮБ анхаарууллаа.
Сүүлийн хоёр хүрэхгүй жилийн хугацаанд дараалан болсон хоёр удаагийн зэвсэгт мөргөлдөөн болон эдийн засгийн хүнд нөхцөл байдлын улмаас Ливаны хүн амын бараг дөрөвний нэг буюу нэг сая гаруй хүн хүнсний ноцтой хомсдолд ороод байгааг НҮБ мэдээлэв.
НҮБ-ын Хүнс, хөдөө аж ахуйн байгууллага (FAO), Дэлхийн хүнсний хөтөлбөр (WFP) болон Ливаны Хөдөө аж ахуйн яам лхагва гарагт хамтран гаргасан мэдэгдэлдээ, ирэх оны дунд үе гэхэд хүнсний хомсдолд өртсөн хүний тоо 1.15 саяд хүрэх төлөвтэй байгааг анхааруулжээ.
“Хөдөлмөр эрхлэх боломж хязгаарлагдмал хэвээр, хүмүүсийн хуримтлал дуусаж, өр зээлийн хэмжээ өсч байгаа бол хүнс, шатахуун болон бусад зайлшгүй хэрэгцээт барааны үнэ өрхийн төсөвт улам их дарамт учруулсаар байна” гэж хамтарсан мэдэгдэлд дурджээ.
“Зарим өрх хуримтлалаа ашиглах, зээл авах, зардлаа танах эсвэл хүнсээ залгуулах өөр арга зам хайх боломжтой хэвээр байна. Харин бусад өрхийн хувьд эдгээр боломж дуусаж байна. Гэр бүлүүдэд түшиглэх юу ч үлдээгүй үед багахан хэмжээний хүндрэл ч тэднийг улам хүнд хямрал руу түлхэж болзошгүй” гэж Дэлхийн хүнсний хөтөлбөрийн Ливан дахь төлөөлөгч, суурин захирал Аллисон Оман Лави хэлжээ.
Ливаны эрх баригчдын тооцоолсноор 2023 оны аравдугаар сараас хойш Израил болон Ливаны зэвсэгт бүлэглэл Хезболлагын хооронд болсон хоёр удаагийн дайны эдийн засгийн хохирол ойролцоогоор 27 тэрбум ам.долларт хүрчээ. Гуравдугаар сард эхэлсэн хамгийн сүүлийн дайны улмаас Ливанд нэг сая гаруй хүн орон гэрээ орхин дүрвэсэн байна. Зургадугаар сард хүчирхийлэл намжсанаас хойш энэ тоо буурч, одоогоор ойролцоогоор 300 мянган хүн дүрвээд байгаа аж.
Израил, Ливаны Засгийн газар хооронд АНУ-ын зуучлалаар зургаадугаар сард байгуулсан, мөргөлдөөнийг зогсоох зорилготой суурь хэлэлцээр байгаа хэдий ч Израилийн цэргүүд Ливаны газар нутгийн зарим хэсгийг эзлэн суусаар байгаа юм.
Хэлэлцээрийн нөхцөлийн дагуу Израилийн цэргүүд эзэлсэн нутгаас гарах ёстой байсан бөгөөд Ливаны арми тэдгээр газарт байр сууриа эзлэхээр тохиролцжээ.
Мөн уг хэлэлцээрт оролцогч тал биш Хезболла бүлэглэлийг зэвсэггүй болгох үүргийг Ливан хүлээсэн байна. Эдгээр мөргөлдөөн эхлэх үед Ливан 2019 онд эхэлсэн түүхэн дэх хамгийн хүнд эдийн засгийн хямралаасаа гарахаар тэмцэж байв.
Бейрут хотын эрх баригчид Олон улсын валютын сангаас (ОУВС) санхүүгийн тусламж авахыг эрмэлзэж байгаа ч тус байгууллагаас тавьсан шаардлагатай шинэчлэлүүдийг одоогоор хэрэгжүүлж амжаагүй учраас санхүүгийн тусламжийг хараахан аваагүй байгаа юм.
