Монгол улсын баг “ABU ROBOCON-2019 MONGOLIA” олон улсын тэмцээний дэд аварга боллоо

Ерөнхий сайд У.Хүрэлсүхийн ивээл дор БСШУСЯ -ны дэмжлэгээр “ABU ROBOCON-2019 MONGOLIA” тэмцээн Монгол Улсад анх удаа зохион байгуулагдлаа. Тэмцээн Буянт-Ухаа спорт цогцолборт болж байгаа бөгөөд Монгол Улсын Ерөнхий сайд У.Хүрэлсүх тэмцээнд оролцогчдод амжилт хүсч, зарим тоглолтыг үзэж сонирхсон юм. Энэ удаагийн “ABU ROBOCON-2019 MONGOLIA” тэмцээнд дэлхийн 16 улсын 17 багийн 290 гаруй тамирчин өрсөлдлөө.
Оюутан залуусын бүтээлч, шинжлэх ухаанч, үзэл хандлагыг хөгжүүлэхэд өндөр ач холбогдолтой энэхүү Олон улсын тэмцээнийг Азийн өргөн нэвтрүүлгийн холбооны гишүүн МҮОНРТВ-ээс зохион байгуулсан юм.
ABU ROBOCON-2019 MONGOLIA тэмцээнд Монголын баг тамирчид идэвхитэй, амжилттай оролцож, хоёрдугаар байрт шалгарав.
БСШУСЯ-ны Дээд боловсролыг чанаржуулах бодлогын хүрээнд хэрэгжүүлж байгаа CDIO буюу инженерийн боловсролын үр дүнд суурилсан шинэ арга зүйгээр суралцсан оюутнууд ийнхүү амжилт гаргажээ.
Тэмцээний ерөнхий шүүгчээр МУИС-ийн багш Ө.Батбаяр, Монгол Улсад зохион байгуулагдаж буй робокон тэмцээний зохион байгуулах хорооны зөвлөх А.Замилан, ABU-ийг төлөөлж, Японы нийслэл Токиогийн Институтийн хүндэт профессор Шимизү Масаши, Вьетнамын үндэсний телевизийн хэмжилзүйн төвийн дэд захирал Үэн Дэ Тун, Фижи телевизийн робоконы ерөнхий зөвлөх Майкл Дэниел Кайзер Вүүд нар ажиллав.
Тус тэмцээнд 16 орны 17 баг оролцон, эцсийн шатанд Монголын нэгдүгээр баг болон Хонг Конгийн баг эн тэнцүүхэн өрсөлдөж, Хонг Конгийн баг тэргүүн байрт шалгарлаа. Шилдэг санаа шагналыг Индонез, шилдэг инженер шагналыг БНХАУ, шилдэг дизайнер шагналыг Японы баг, ивээн тэтгэгчдийн шагналыг Монголын хоёрдугаар баг, Вьетнам, Египет, Япон, Непал, Фижигийн баг хүртлээ.