БНХАУ-д зохион байгуулагдаж буй Дэлхийн сагсан бөмбөгийн холбооны хамгийн том тэмцээн болох ДАШТ наймдугаар сарын 31-ний өдөр эхэлсэн билээ. Энэ удаагийн ДАШТ-д тив тивийн шилдэг 32 улсын шигшээ баг өрсөлдөж байгаа бөгөөд тэмцээний хэсгийн тоглолтууд тун ширүүхэн үргэлжилсээр байна.
Өчигдөр хэсгийн найман тоглолт явагдсан бөгөөд эдгээрээс хоёр тоглолт үзэгчдийн анхаарлыг ихээр татлаа. Тэдний нэг бол дэлхийн хамгийн хүчирхэг лигтэй АНУ-ын баг Туркийн шигшээ багтай хийсэн тоглолт байлаа. Сагсан бөмбөгийн мэргэжилтнүүдийн үзэж байгаагаар түүхэн дэх хамгийн сул багаа бүрдүүлсэн гэх АНУ энэхүү тоглолтод нэмэлт цагт 93:92-ын харьцаатайгаар хожил байгуулсан байна. Нэмэлт цагийн сүүлчийн минутанд Туркийн баг торгуулийн шидэлтээ алдснаар хожил авах боломжоо алдсан юм. Хэдийгээр энэхүү тоглолтод хожил авсан хэдий ч АНУ-ын шигшээ баг Ж.Татумыг бэртэлд алдсан нь тун харамсалтай явдал болж байгаа юм. Тун хэцүүхэн тоглолтод ялалт байгуулсан АНУ хоёр хожилтойгоор ийнхүү Е хэсгийг тэргүүлж эхэлсэн бөгөөд хэсгийн сүүлийн тоглолтоо Ази тивийн төлөөлөл Япон улсын багтай хийнэ. Харин хоёр дахь тоглолтондоо ялагдал хүлээсэн Туркийн шигшээ баг Чехийн багтай тоглох хуваарьтай.
Харин үзэгчдийн анхаарлыг ихээр татсан нөгөө нэг тоглолт бол Грек болон Бразилын шигшээ багийн тоглолт байлаа. Энэхүү тоглолтод ахмад, туршлагатай тоглогчдоос багаа бүрдүүлсэн Бразилын шигшээ баг Грекийн багийг 79-78-ын харьцаатайгаар хожлоо. Хэдийгээр тоглолтын эхлэлийг Грекчүүд амжилттай тавьсан хэдий ч гуравдугаар үед Бразилын шигшээ баг тоглолтын хэмнэлийг эргүүлж чадсанаар энэхүү тоглолтод хожил авч чадсан юм.
Есдүгээр сарын 3-д болсон тоглолтын үр дүнгүүд:
• Австрали 81-68 Сенегал
• Литва 92-69 Канад
• Йордан 64-103 Франц
• Герман 68-70 БНДоминикан
• Бразил 79-78 Грек
• Монтенегро 83-93 Шинэ Зеланд
• АНУ 93-92 (н.ц) Турк
• Япон 76-89 Чех харьцаатайгаар тус тус хожил авсан байна.
АНУ-ын шигшээ баг цаг сунгаж Туркийн багийг хожлоо
}
Шинэ мэдээ
