Дэлхийн сагсан бөмбөгийн холбооноос зохион байгуулсан эрэгтэйчүүдийн 18 дахь удаагийн дэлхийн аварга шалгаруулах тэмцээн наймдугаар сарын 31-ээс есдүгээр сарын 15-ны өдрүүдэд өмнөд хөршийн Бээжин, Шанхай, Донгуан, Гуанжу, Нанжин, Вухан, Фошан, Шенжен хотуудад зохион байгуулагдлаа.
Энэ удаагийн ДАШТ-д Африкийн 5, Ази, номхон далайн 8, Европын 12, Америкийн 7 нийт 32 улсын баг оролцсон юм. Тэмцээний аваргын алтан медалийн төлөө 1950 оны дэлхийн аварга, 2008 оны олимпийн аварга Аргентин улс болон 2006 оны дэлхийн аварга Испаний шигшээ баг тоглосон юм. Энэхүү тоглолтын эхнээс Испанийн баг тэргүүлж эхэлсэн бөгөөд тэргүүллээ алдалгүй тоглосоор 95:75-ын харьцаатай ялалт байгуулж дэлхийн хошой аварга улс боллоо.
Харин хүрэл медалийн төлөө Франц болон Австрали улсын шигшээ баг тоглож 67:59-ийн харьцаатай Францын баг хожсон байна. Францын шигшээ багийн хувьд Испани улсад зохион байгуулагдсан өмнөх ДАШТ-ээс мөн хүрэл медаль хүртсэн юм.
Ийнхүү 16 хоног үргэлжилсэн 18 дахь удаагийн ДАШТ-ий хамгийн үнэ цэнэтэй тоглогчоор Испаний шигшээ багийн тоглогч Р.Рубио нэрлэгдсэн бол бэлэгдлийн шигшээ багт Сербийн Б.Богданович, Францын Е.Фурнье, Аргентины Л.Скола болон Испаний Р.Рубио, М.Газол нар багтжээ.
