Эдгээр өдрүүдэд Бүгд Найрамдах Казакстан улсад зохион байгуулагдаж буй “Нур-Султан 2019” чөлөөт бөхийн ДАШТ өнөөдөр эрэгтэйчүүдийн 57, 65, эмэгтэйчүүдийн 62, 68 кг-ын жингийн урьдчилсан болон хагас шигшээ барилдаанаар үргэлжилж байна. Манай улсаас өнөөдөр /2019.09.19/ Хөдөлмөрийн баатар С.Батцэцэг, гавьяат тамирчин Э.Бэхбаяр, ОУХМ Т.Тулга, Э.Гантуяа нар барилдах хуваарьтай юм.
Эрэгтэйчүүдийн 57 кг-д барилдаж буй гавьяат тамирчин Э.Бэхбаяр эхний барилдаанд Тажикистан улсын бөх Мухамад Икромовтой учраа таарчээ. Энэхүү барилдаан эхлээд удаагүй байхад хөлдөө алдсан бөгөөд М.Икромов манай бөхийг шахаж эргүүлэн зургаан оноо авсан юм.
Үүнээс хойш дахиж оноо алдалгүй нөхөж явсаар манай тамирчин 8:6-аар ялж тэмцээний эхний даваагаа давсан юм.
Хоёрдугаар тойрогтоо өмнөх барилдаандаа Науру улсын бөхийг цэвэр ялсан, 2017 оны залуучуудын Азийн аварга Узбекистаны Жахонгирмирзо Туробовтой барилдлаа. Энэхүү барилдаанд манай бөх 6:0-ээр ялсан. Харин шигшээ наймын барилдаанд Өнгөрсөн жилийн дэлхийн аварга, энэ жилийн Европын наадмын хүрэл медальт ОХУ-ын Заур Угуевтай барилдсан.
Эхний үед торгуулиар 1 оноо алдсан манай бөх этүүлээд ардаа алдаж, хоёр оноо нэмж алдсан. Хоёрдугаар үед хөлд амжилттай орж, хоёр оноо авсан ч нэмж оноо авалгүй, дахин хоёр оноо алдан 2:5-аар ялагдлаа. Ингэснээр тэрээр ОХУ-ын бөхийн дараагийн барилдаанаас тэмцээнээ үргэлжлүүлэх нь шийдэгдэнэ.
Эмэгтэйчүүдийн 68 кг-д С.Батцэцэг эхний тойрогт Узбекистаны Нилуфар Гадаеватай таарч 25 секундэд цэвэр яллаа.
Тэрээр дараагийн тойрогтоо 2014 оны ДАШТ-ий хүрэл медальт, энэ жилийн Европын наадмын аварга Латвийн Анастасия Григорьеватай барилдсан. Энэхүү барилдаанд манай бөх 6:0-ээр ялж шигшээ наймд үлдсэн. Харин хагас шигшээд ДАШТ-ий мөнгө, хүрэл медальт Францын Кумба Ларроктой хүч үзнэ.
Эмэгтэйчүүдийн 57 кг-ын жинд барилдсан С.Цэрэнчимэд эхний тойрогт Японы улсын бөх Риогийн олимпын наадмын аварга, 2017, 2018 оны дэлхийн аварга Кавай Рисакод оноогоор цэвэр ялагдсан.
Улмаар тэрээр дагах барилдаанд Пан Америкийн нэг алт, гурван хүрэл медальт Эквадорын Лиссетте Антестэй барилдлаа. Торгуулийн 30 секундын оноогоор тэргүүлж эхэлсэн ч Антес торгууль дуусахтай зэрэгцэн хөлд нь орж, хоёр оноо авсан юм. Дараа нь манай бөх мэх хийх үедээ хоёр оноо, хөлд нь орох гэж оролдох үедээ мөн хоёр оноо алдаж, улмаар 4:8-аар ялагдаж тэмцээнээ дуусгасан юм.
Эрэгтэйчүүдийн 65 кг-д ОУХМ Т.Тулга Беларусын якут бөх Ньюргун Скрябинтай эхний тойрогт барилдлаа. Түүний хэсэгт Энэтхэгийн Бажранг Пуния, Казахстаны Даулет Ниязбеков нар байгаа бол нөгөө хэсгийг “Үхлийн хэсэг” хэмээн бөх сонирхогчид үзэж байна. Эхний тойргийн барилдаанд Т.Тулга якут залууг илүүрхэн, оноо авсаар эхний барилдаанаа 5-2 ялсан бөгөөд дараагийн тойрогт Нидерландын бөх Масуд Ниазитай барилдахаар болсон юм. Харин хоёрдугаар тойргийн барилдаанд Ниазиг торгуулийн 30 секундээ дуусахтай зэрэгцэн хөлд ороход нь манай бөх дагуулж, мушгин 4 оноо авч улмаар даралтаар цэвэр ялсан юм.
