Б.Нацагдорж: “Ocean grey” албан ёсны уран бүтээлийн нээлтээ зарлаж байна

 

 

 

 

 \”Ocean grey” студийн продьюсер, хөгжмийн найруулагч Б.Нацагдоржтой ярилцлаа.

 -\”Ocean grey” студийн үйл ажиллагааны тухай ярьж ярилцлагаа эхэлье?

 -Студиэ байгуулаад гурван жил болж байна л даа. Анх \”Prosound” студийн
дэргэд үйл ажиллагаагаа явуулж байлаа. Харин өнгөрсөн жилээс тусдаа
ажиллаж байна. Дэлхийн жишигт дүйцэхүйц дуугаралттай, шинэлэг уран
бүтээлүүд гаргах зорилготой ажиллаж байна даа.

 -Өнгөрсөн гурван жилийн хугацаанд нийт хичнээн уран бүтээлчийн хичнээн уран бүтээл дээр ажилласан бэ. Жагсаалт гаргаж үзэв үү?

 -Тоо гаргаж үзээгүй юм байна. Дуучин Х.Отгоогийн \”Chill out”, \”Киви”
хамтлагийн дуучин Ц.Намууны \”One moment” гэх зэрэг цомгууд, багцаалаад
үзвэл 20 гаруй хамтлаг, дуучдын 100 гаруй уран бүтээлүүдэд ажилласан
байх.

 -Таныг уншигчид \”UBS” телевизээс зохион байгуулдаг \”Uniberse best songs” наадмын шилдэг оролцогчоор шалгарч байсныг эчнээ мэднэ. Яагаад өөрийнхөө уран бүтээлийг хийхгүй байна?

 -Залуу байгаа дээрээ өөрийнхөө уран бүтээлийг яагаад хийхгүй байгаа юм
бэ гэж хэлдэг хүмүүс бий. Гэхдээ ор мөргүй хаячихсан юм биш л дээ.
Өөрийгөө бэлтгэж, боловсруулж байна. Өдөр тутам хийдэг дасгал, бэлтгэлээ
хийсээр л байна. Уран бүтээлийн шинэ, содон санаанууд л байна. Одоогоор
төлөвлөөд л явж байна даа.

 

 

 

-Өнгөрсөн хугацаанд \”Ocean grey”–хэн хэд хэдэн томоохон тайз, дэлшэцийн уран бүтээлүүдийн хөгжмийн найруулгын ажлыг хариуцлан ажилласан байх аа? 

-\”Франц үнсэлт”, \”Давхар цохилт” зэрэг дэлгэцийн уран бүтээлүүдэд
ажилласан. Мөн Улсын драмын эрдмийн театрын бүтээл \”Норовын намтар”
хүүхдийн жүжгийн дууны найруулгыг хийсэн. Анхны хүүхдийн хөгжимт жүжиг
шүү дээ.

 -Тун удахгүй танай студиэс \”Ocean grey” шоу тоглолтыг зохион байгуулах гэж байгаа. Энэ тоглолтын тухай яриач?

 -Нэг ийм студи уран бүтээлээ хүргэж эхэлж байна шүү гэдгийг л харуулах
зорилготой тоглолт юм. Түүнээс биш тайлан тоглолт гэж ойлгож болохгүй л
дээ. Нэг үгээр бол албан ёсны уран бүтээлийн нээлтээ зарлаж байгаа
хэрэг. Тоглолт энэ сарын 26-нд \”Crocus” event hall-д зохион
байгуулагдана. Тоглолтонд Зууны манлай эстрадын дуучин, МУГЖ
Б.Сарантуяа, Төрийн соёрхолт дуучин Д.Болд, ая зохиогч, дуучин
Б.Ангирмаа, Э.Болор-Уянга, С.Сэрчмаа, Х.Отгоо,  \”Sweetmotion” хамтлагийн
дуучин Э.Ганболор, \”3 охин” хамтлагийн дуучин Г.Анхмаа, Ч.Цэлмүүн,
реппер Цэцэ, \”Камертон”, \”Киви”, \”Opozit”, \”Honeymoon” хамтлагууд гэх
зэрэг олон олон уран бүтээлчид оролцоно.

 

 

-Студиэс зохион байгуулж байгаа шоу тоглолт учраас бусад тоглолтуудаас өвөрмөц болох байх?

 -Тийм шүү. Зүгээр нэг хөтлөгч гарч ирээд уран бүтээлчээ зарлаад дуулах
тоглолт байлгамааргүй байна л даа. Тийм ч болохоор аль болох өвөрмөц
найруулга, зохиомжтой байлгахаар төлөвлөсөн. Тоглолтонд оролцох уран
бүтээлчдэд маань ч энэ нь сонирхолтой.

 -Студийнхээ үндсэн артистуудыг сонгон шалгаруулж байгаа тухай сонссон. Энэ тухайд?

 -Тийм ээ. Шалгаруулалт явуулсны үндсэн дээр таван уран бүтээлчийг
шалгаруулж авсан. Цоо шинэлэг өнгө төрх, өвөрмөц хоолойтой уран
бүтээлчид. Эдгээр уран бүтээлчид маань удахгүй болох тоглолтонд мөн
оролцоно.