Чөлөөт бөхийн 23 хүртэлх насны ДАШТ Унгарын нийслэл Будапештийн “Ludovika Arena” ордонд явагдаж өндөрлөлөө. Тус тэмцээнд Монгол Улсын баг тамирчид амжилттай оролцож, медалийн үзүүлэлтээр айргийн тавд багтжээ.
ДАШТ-ий гурав дахь өдөр эрэгтэйчүүдийн 74 кг-ын жинд насанд хүрэгчдийн ДАШТ-ий тавдугаар байрын шагналт, цэргийн ДАШТ-ий хүрэл медальт, “Poland Open”, Дмитрий Коркин, “Байгаль Опен”, “Монголиа Опен” ОУТ-ий медальт, үндэсний шигшээ баг, “Алдар” спорт хорооны тамирчин, ОУХМ Бат-Эрдэнийн Бямбадорж хүрэл медалийн эзэн болсон юм. Тэрээр энэхүү тэмцээнд анх удаа оролцож байгаа бөгөөд шигшээ 8-д шалгарахын төлөө Кыргызстаны Мансур Сыргак-Уулу-тай барилдаж 7:2-оор ялсан байна. Гэвч шөвгийн наймд энэ жилийн Азийн АШТ-ий хүрэл медальт Ираны Мохаммад Нокходид 6:10-аар ялагдснаар дагах барилдаан хийхээр болжээ. Дагах барилдаанд энэ жилийн 23 хүртэлх насны Азийн аваргад хүрэл медаль хүртсэн Казахстаны Дархан Ессенгалиг 4:4-өөр ялж хүрэл медалийн төлөө барилдах эрхтэй болсон бөгөөд Хүрэл медалийн төлөө Унгарын Дагестан легионер Мурад Курмагомедовыг 5:2-оор ялж ДАШТ-ий хүрэл медалийн эзэн болжээ.
Харин 125 кг-ын жинд залуучуудын болон 23 хүртэлх насны Азийн дэд аварга, Тахтийн цом, Дмитрий Коркин, Дмитрий Миндиашвили, “Байгаль Опен”, “Монголиа Опен” ОУТ-ий хүрэл медальт, Роман Дмитриев, Борис Будаевын нэрэмжит залуучуудын ОУТ-ий аварга, “Даян” дэвжээ, “Жем Интернэшнл” компанийн тамирчин, “Аварга” сургуулийн оюутан ОУХМ Мөнхтөрийн Лхагвагэрэл Унгарын нийслэлээс Монголын эрэгтэй баг тамирчдын хоёр дахь хүрэл медалийг авчирлаа. Тэрбээр Монголын чөлөөт бөхийн түүхэнд нас насны ангиллаас хамгийн хүнд жинд дэлхийн анхны медальтан болж байгаа юм.
М.Лхагвагэрэлын хувьд тэгшитгэлийн барилдаанд Кыргызстаны Музаффар Жаппуевыг оноогоор цэвэр (12:1) ялсан ч 1/8 шигшээд ОХУ-ын Виталий Голоевт 2:3-аар ялагдсан юм.
Харин дагах барилдаанд БНХАУ-ын өвөрмонгол залуу Эр Сонгбуг 6:1-ээр, Бүх Африкийн наадам болон Африк тивийн хошой аварга Египетийн Халед Мохамед Абдаллаг 12:1-ээр ялж хүрэл медалийн төлөө барилдах эрхтэй болсон. Тэмцээний хүрэл медалийн төлөөх барилдаанд АНУ-ын Даниэль Керквлиет-тэй хүнд барилдаан хийсний эцэст 4:4-өөр ялж хүнд жингийн анхны медалийг эх орондоо авчирлаа.
Тэмцээний нийлбэр дүнгээр ОХУ тэргүүлсэн бол Иран. Азербайжан, Гүрж, Монгол улсууд эхний тавд жагсчээ.
