УИХ-ын гишүүн С.Амарсайхан өнөөдөр Хятад улсын компанид 50 газар өгсөн гэх асуудлаар албан ёсны тайлбар мэдээлэл өглөө.
Тэрбээр хэлэхдээ “2019 оны хоёрдугаар сарын 27-ны өдрөөс 2020 оны зургаадугаар сарын 27-ны өдөр хүртэл нийслэлийн Засаг даргын үүрэгт албыг хашсан. Энэ хугацаанд Хятад улсын компанид 50 га газар олгож, дотоодын үйлдвэрлэл эрхлэгч, тариаланчдын эрх ашигт ноцтой халдаж байна гэх үндэслэлгүй мэдээлэл цацагдах болсон. Энэ бол үндэслэлгүй худал мэдээлэл гэдгийг хэлмээр байна. С.Амарсайханыг үгүйсгэж болно, гэхдээ энэ бүгд хуулийн хэмжээнд хязгаартай байх ёстой гэж бодож байна” хэмээв.
Мөн уг асуудлаар нийслэлийн Засаг даргын үүрэг гүйцэтгэгч Ж.Батбаясгалан, нийслэлийн Газар зохион байгуулалтын албаны дарга А.Энхманлай нарт хандан Хятадын компанид 50 га газар олгосон гэх асуудлыг нягтал өгөхийг хүсч, албан бичиг хүргүүлсэн байна. Албан бичгийн хариуд нийслэлийн Газар зохион байгуулалтын албанаас “УИХ-ын гишүүн С.Амарсайхан нийслэлийн Засаг даргаар ажиллаж байх хугацаанд БНХАУ-ын ямар нэг иргэн, аж ахуйн нэгжид ногоо тарих зориулалтаар 50 га газар олгоогүй байна” гэсэн бичиг ирүүлжээ.
УИХ-ын гишүүн С.Амарсайхан “Нийслэлийн Засаг даргын албан тушаалыг авснаас хойш Хятадын эрлийз, тагнуул гэх утга бүхий гүтгэлэг ихээхэн цацагдаж байна. Миний бие тухайн үед Тагнуулын байгууллагад гомдол гаргаж, шалгаж өгөхийг хүссэн. Тагнуулын ерөнхий газар жил гаруйн хугацаанд шалгасны дүнд Үндэсний төв архивын лавлагаанд Увс аймгийн Бөхмөрөн сумын 1944 оны хүн амын тооллогын баримтууд нь Тагнуулын ерөнхий газрын тусгай архивын лавлагаа мэдээлэлтэй тохирч байна. Таны эцэг Ишбалын Сайнбуян 1924 онд, эх Зулын Цэвээн 1932 онд одоогийн Увс аймгийн Бөхмөрөн суманд төрсөн. Таны гарал үүсэлтэй холбоотой үндэслэлгүй худал мэдээллийг олон нийтэд тараасан иргэдийн үйлдлийг гэмт хэргийн харьяаллын дагуу цагдаагийн байгууллагаар шалгуулна уу гэсэн бичгийг Тагнуулын ерөнхий газраас өгсөн” гэдгийг онцоллоо.
Дашрамд дурьдахад, нийслэлийн Засаг даргаар ажиллаж байхдаа хуулиар олгосон эрх, үүргийнхээ хүрээнд иргэд, аж ахуйн нэгжүүдийн газрын зохицуулалттай холбоотой үйлчилгээ үзүүлэх, газар зохион байгуулалтын асуудлаар шийдвэр гаргаж ажилласан. Ингэхдээ нийт 158 газрыг нийтийн эзэмшилд авч, эхнээсээ тохижилтын ажлуудыг хийж, эхнээсээ ашиглалтад ороод байгаа. Тухайлбал, Сүхбаатарын талбайн урд талын 2.5 га талбайн газар Улаанбаатар хотын банкны мэдэлд 15 жилийн өгч, 10 сая ам.долларын барьцаанд тавьсан байсныг эрхийг нь цуцалж, нийтийн эзэмшилд шилжүүлсэн.
Төмөр замын цэцэрлэгт хүрээлэнг Авлигатай тэмцэх газар олгосон байсныг буцаан авч цэцэрлэгт хүрээлэнгийн зориулалтаар тохижуулсан. Хил хамгаалах ерөнхий газрын дэргэдэх 1.8 га талбайг хувийн хэвшилд өгсөн байсныг нийтийн эзэмшилд авч, тохижуулсан. Хуучин ахмадын холбооны байрыг мөн нийтийн эзэмшилд авч, цэцэрлэгт хүрээлэн байгуулсан. Богд хааны ордон музей, Чойжин ламын сүм музейн тохижилтын ажлууд хийгдэж байгаа гэдгийг УИХ-ын гишүүн С.Амарсайхан хэвлэлийн бага хурлынхаа үеэр тодотгон хэлсэн юм.
