Улсын онцгой комисс, Засгийн газраас өндөржүүлсэн бэлэн байдалд шилжсэн хугацааг есдүгээр сарын 15-н хүртэл сунгасан. Тэгвэл ирэх долоо хоногийн УОК, Засгийн газрын хуралдаанаар өндөржүүлсэн бэлэн байдлыг сунгах эсэхийг хэлэлцэх юм байна.
Улсын онцгой комиссын дарга, Шадар сайд Я.Содбаатар “УОК хуралдаад өндөржүүлсэн бэлэн байдлын хугацааг энэ сарын 15-н хүртэл сунгах шийдвэр гаргасан. Үүнээс хойш хэрхэн ажиллах вэ гэдгийг ирэх долоо хоногт Засгийн газрын хуралдаанаар хэлэлцэн шийдвэрлэнэ.
УОК-ын 30 дугаар хуралдаан болно, дараа нь Засгийн газрын хуралдаанаар эцсийн шийдвэр гаргана.
Асуудал хариуцаж байгаа хүний хувьд харахад өндөржүүлсэн бэлэн байдлын зэрэглэл буурахгүй байх гэж бодож байна. Гэхдээ дотоодод цар тахал алдаагүй байгаа учраас дотоодод явуулж байгаа худалдаа үйлчилгээний чиглэлийн бүх үйл ажиллагааг хэвийн горимд шилжүүлнэ. Худалдаа үйлчилгээний салбарт тавьж байгаа бүх шаардлагыг хэвийн горимд оруулна. Мөн хичээл сургуулийн үйл ажиллагааг үе шаттайгаар хэвийн горимд шилүүлнэ гэж бодож байгаа.
Энэ сарын 14-нөөс аймгийн төвийн сургуулиуд танхимын сургалт руу шилжүүлэх бол 21-нээс нийслэлийн сургуулиудыг шилжүүлнэ. Есдүгээр сарын 14-нөөс МСҮТ, аравдугаар сарын 4-нөөс их дээд сургуулиудын хичээлүүдийг хэвийн болгохоор ажиллаж байна.
Нэг өдөр бүгдийг нь хэвийн горимд оруулбал хүний бөөгнөрөл үүсэх эрсдэлтэй. Тиймээс үе шаттай шилжүүлье гэж мэргэжлийн байгууллага үзсэн. Хил нээх тухайд энэ цар тахал хэзээ намжиж улс орнууд хэзээ хилээ нээхийг хэн ч хэлж мэдэхгүй байна. Манай улсын хувьд ирэх оны эхний хагас хүртэл хязгаарлалттай амьдрах нь. Дэлхий нийтэд ч хилээ нэгээд, өндөржүүлсэн бэлэн байдлаа сулруулаад өвчин дахин дэгдсэн тохиолдол их байна.
Тиймээс яг одоогоор хилээ хэзээ нээхийг хэлж мэдэхгүй байна” гэлээ.
