УИХ-ын дарга Г.Занданшатар өнөөдөр /2020.10.09/ Налайх дүүргийн иргэдтэй уулзаж, Засаг захиргаа нутаг дэвсгэрийн нэгж, түүний удирдлагын тухай хуулийн төслийн хэлэлцүүлэг өрнүүллээ. Уулзалтанд УИХ-ын гишүүн С.Амарсайхан, Ц.Сандаг-Очир, НИТХ-ын сонгуулийн 23-р тойрогт МАН-аас нэр дэвшигч Ч.Раднаабазар, Б.Нэргүй нар болон дүүргийн ИТХ-ын сонгуульд нэр дэвшигчид, бусад албаны хүмүүс оролцлоо. Уулзалтын үеэр УИХ-ын дарга Г.Занданшатар УИХ, Засгийн газраас үндсэн 5 чиглэлд анхаарч ажиллахаар зорьж байгаа гэдгийг танилцуулсан юм.
УИХ-ын дарга Г.Занданшатар “Бид Монгол улсаа сэргэн мандлын шинэ замд гаргах төлөвлөгөөг батлан хэрэгжүүлж байна. Засгийн газрын 2020-2024 оны мөрийн хөтөлбөр болон ирэх 5 жилийн Үндсэн таван чиглэлийг баталлаа. Эдгээр хөтөлбөр нь мөрөөдлийн жагсаалт биш. Салбар бүрт эрс шинэчлэлт хийх зорилготой, бодлогын баримт бичиг юм. УИХ, Засгийн газраас цар тахлын хэцүү үед иргэдийн орлогыг дэмжихэд онцгойлон анхаарч байна. Тухайлбал, хүүхдийн 100 мянган төгрөгийг он дуустал олгоно. Үүнд 1 их наяд төгрөг зарцуулж байна. Ирэх оны төсөвт ч үргэлжлүүлэн олгохоор санхүүжилтийг нь тусгасан. Түүнчлэн, иргэд, ААН-үүдээ дэмжих үүднээс Нийгмийн даатгалын хөнгөлөлт, чөлөөлөлтөд 1,9 их наяд төгрөгийг зарцуулж байна. Хүнд цаг үеийг төр зөв бодлогоор давж гарах ёстой.
УИХ, Засгийн газар саарал жагсаалтаас гарахад ахиц дэвшилтэй ажиллаж буй олон улсын байгууллагууд үнэлсэн, бүх шатанд сахилга хариуцлагыг нэмэгдүүлэхэд ахиц гарч байгаа, иргэд www.lawforum.mn вэб сайтаар дамжуулан хуулийн хэлэлцүүлэгт өөрсдийн саналаа өгөх боломж бүрдсэн гээд олон дэвшлийг онцлон тэмдэглэхэд таатай байна.
Цаашид, төрөөс халамжийн бодлогоос аль болохоор татгалзаж, үйлдвэрлэгч орон болохоор зорилт тавьж байна. Үйлдвэрлэлийг хөгжүүлж, хүн бүр ажил, орлоготой байхад Налайх дүүргийн хөгжил, дэвшил чухал үүрэг, нөлөөтэй юм. Монгол Улсын Үндсэн хуулийн нэмэлт, өөрчлөлтөөр Налайх дүүргийг хотын статусаар хөгжүүлэхээр заасан. Энэ хүрээнд холбогдох хууль тогтоомжуудад өөрчлөлт оруулахаар ажиллаж байна. Нийслэлийн эрх зүйн байдлын тухай хууль, Хот тосгоны эрх зүйн байдлын тухай хуульд нэмэлт өөрчлөлт оруулж, Налайх дүүргээ бие даасан хот болгохоор УИХ-ын С.Амарсайхан идэвх санаачилгатай ажиллаж байгааг энд онцлон тэмдэглэх хэрэгтэй. 36,4 мянган хүн амтай Налайх хот цаашид ч хүрээгээ тэлэхээр байна. Налайх дүүрэг бие даасан хот болсноор төсвөө өөрөө захиран зарцуулах эрхтэй, хөдөө аж ахуй, аж үйлдвэрийн цогцолбор болон хөгжих боломжтой. Бид УИХ-аар хэлэлцүүлэх гэж буй Засаг захиргаа, нутаг дэвсгэрийн нэгж, түүний удирдлагын тухай хуулиар олон асуудлыг тодорхой болгоно. Иймээс ч та бүхнийхээ саналыг сонсохоор ирлээ. Налайх дүүрэг улсын хэмжээний бие даасан хот болон хөгжихөд та бүхний санал санаачилга хамгийн чухал” гэв.
Энэ үеэр иргэд тодорхой хэд хэдэн асуудлаар саналаа хэлж, асуулт асуулаа. Тухайлбал, уурхайчдын нийгмийн асуудалд анхаарах, тэтгэвэр тэтгэмжийн хэмжээг нэмэгдүүлэх, ужгирсан газрын асуудлыг шийдвэрлэх, жижиг дунд үйлдвэрийг хөгжүүлэх чиглэлээр олгодог санхүүжилтийн хэмжээг нэмэгдүүлэх асуудлыг хөндөж, хариулт авлаа.
УИХ-ын гишүүн, Налайх дүүргийн МАН-ын хорооны дарга С.Амарсайхан “Иргэдийнхээ тавьж байгаа асуудлыг бид шат дараалан шийдвэрлэнэ. Заримыг нь шийдвэрлэж, өнгөрсөн жилүүдэд анхаарч ирсэн асуудлууд байна. 100 жилийн түүхтэй Налайхын уурхайд хөдөлмөрөө зориулсан ахмадуудынхаа хөдөлмөрийг үнэлэх, нөхөн олговор асуудал олон жил яригдаж ирлээ. Энэ асуудлыг бид Ерөнхий сайдад уламжилж, ойрын хугацаанд шийдвэрлэхээр зорьж байна. Хоёрдугаарт, бид иргэдийн тавьж буй ажлын байрны асуудал, хөнгөлөлттэй зээлийн хүртээмжийг сайжруулахад анхаарч байна.
Шаардлага хангасан нөхөрлөлүүд энэ жилдээ гэрээгээр үүргээ хүлээж, Налайхын уурхайд ажиллана.
Харин ирэх жилээс уурхайд ажиллахыг бүрэн зогсооно. Үүний оронд бид шахмал түлшний үйлдвэр барьж, 1500 ажлын байрыг бий болгож байна. Налайхын уурхай орчимд 2000 орчим га газар талхлагдаж, хаа сайгүй нүх бий болж, ихээхэн эрсдэл үүссэн. Тиймээс бид уурхайчид, иргэдийнхээ эрүүл мэндийн төлөө баталгаат ажлын байрыг бий болгож, дэмжиж байна. Цаашдаа ч энэ мэт ажлын байр гаргаж, Налайхчуудаа түлхүү ажиллуулах бодлого барина” гэлээ.
Уулзалтын төгсгөлд УИХ-ын дарга Г.Занданшатар “Налайхчууд энэ удаагийн парламентад хоёр төлөөлөлтэй болсон. НИТХ-ын түвшинд ч хоёр төлөөлтэй болно. Бид шат шатандаа иргэд та бүхнийхээ хөндсөн асуудал бүрийг сонсон шийдвэрлэж, эргэх холбоотой ажиллана. Засгийн газрын ирэх дөрвөн жилийн мөрийн хөтөлбөрийг шат шатандаа, иргэддээ хүргэж ажиллана гэдэгт найдаж байна” гэсэн юм.
