УИХ-ын чуулганы өнөөдрийн хуралдаанаар “Коронавируст халдвар /КОВИД-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах талаар чиглэл өгөх тухай” Улсын Их Хурлын тогтоолын төслийг хэлэлцэж байна.
Тогтоолын төсөл батлах ёстой ч өнөөдрийн үүсээд буй нөхцөлд хэтэрхий удаан бөгөөд асуудлыг шийдвэрлэхэд дөхөм болохгүй байна гэдгийг УИХ-ын гишүүд хэлж байна.
Манайд бүх салбарт шинжлэх ухаанч хандлага алга
Тухайлбал УИХ-ын гишүүн Ц.Даваасүрэн цар тахлын нөхцөл хүнд байгаа хэдий ч ЗГ, УИХ-аар хэлэлцэж буй тогтоолын төслүүд ард иргэдэд дэмжлэг болж чадахгүй байна гэсэн шүүмжлэлийг хэлсэн юм.
Түүний хувьд бизнесийн салбарыг халдвар хамгааллын өндөр түвшинд яаралтай нээх нь зүйтэй гэсэн байр суурийг өмнөх хуралдааны үеэр ч хэлж байв. Нэгэнт бизнесийн үйл ажиллагаа нь зогссон байгууллага, иргэдэд татварын хөнгөлөлт үзүүлж байгаа нь цагаа олоогүй гэдгийг хэлсэн.
Тэрбээр “Ковид бидэнд нэг том анхааруулга өглөө. Манайд бүх салбарт шинжлэх ухаанч хандлага алга. Улс төрчид өөрсдийгөө шинжлэх ухааны салбараас том, өөрсдийнхөө үгийг үнэн гээд бодчиж. Нэг ТББ биднээр тоглочихлоо. Бид үүнд нь шинжлэх ухаанч хариулт өгч чадахгүй байна. Дэлхийгээр нэг эрдэмтэд нь тарсан. Тэдэнтэйгээ цахимаар холбогдож байна.
Бизнесийг зогсоож, амьдралаа зогсоож болохгүй. Ажилгүй, орлогогүй болсон иргэд ямар татвараа хөнгөлүүлэх юм бэ. Ариун цэврийг нь сахиулаад бизнесийн салбараа нээх хэрэгтэй. Бид нэг л том зүйл ярьдаг. Одоо ямар хариуцлага тооцов. Хэдэн хүн цагдаад өгсөн юм яриад сууж байна лээ. Хэн ямар хариуцлага хүлээсэн юм бэ. УИХ зөвхөн хууль тогтоодог байгууллага биш. Бүх салбарт чиглэл өгч болно. ЗГ буруу шийдвэр гаргасан бол бид засаж залруулж байх ёстой. Хяналт хариуцлагын талаар юу ярив” хэмээн саналаа хэлсэн юм.
