Хүүхэддээ ном уншиж өгөхийн ашиг тусууд

 

Бид бүгд хүүхэддээ ном уншиж өгөх нь хүүхдэд сайн, хэрэгтэй гэж мэдэх боловч яг үнэндээ задалж бодож үзэж байлуу? Тэгвэл хүүхдүүддээ ном уншиж өгснөөр ямар давуу талууд бий болдог талаар жагсаая.

 

 

1. Эцэг эх хүүхдийн хоорондын харилцаанд чухал үр нөлөөтэй. Хүүхэд мэдээж өсч том болохын хирээр хөдөлгөөнд орж танд тэр болгон тэврүүлээд эрхлээд байхгүй болдог. Тэгвэл энэ бага насны үед нь хүүхдээ өвөр дээрээ суулган ном уншиж өгөх нь танд болон таны хүүхдэд мартагдашгүй сайхан дотно мэдрэмж холбоог төрүүлдэг байна.
2. Сургуулийн өмнөх насныханд ном уншиж өгөх нь тэдний ирээдүйн боловсролын их аянд гарахад нь том хувь нэмэр оруулдаг төдийгүй суралцах арга барилын нь үндэс болдог байх нь. Сургуульд суралцагсдын дунд явуулсан судалгаанаас харахад бага насандаа ном уншуулж байсан хүүхдүүд сурлагын хувьд бусдаасаа хамаагүй дээгүүр байдаг нь батлагдсан байна.
3. Хэл ярианы чадвар хөгждөг. Мэдээж багаасаа олон үлгэр ном уншуулж уншиж байсан хүүхдийн хэл яриа болон үгсийн сан бусадтай харьцуулахад маш сайн байх нь дамжиггүй.
4. Ном унших арга барил хөгждөг. Номыг зүүнээс баруун унших, баруунаас зүүн уншихыг хүүхэд харж суралцахгүй л бол мэдэхгүй нь ойлгомжтой. Үг болгоны хооронд зай байдаг, дуусахад цэг байдаг гэх зэрэг анхан шатны өгүүлбэр үгсийн бүтцийг мэдэж авсан байдаг байх нь.
5. Харилцааны суурь чадвар. Хүүхдэд хэдий чинээ их ном уншиж өгнө, төдий чинээгээр хүүхэд өөрийгөө эрүүл аргаар илэрхийлэх, харилцааны чадвартай болдог байх нь. Номын туршид гарах үлгэрийн баатруудын харилцаа, мөн таны ном уншиж өгөх арга барилаас хүүхэд тань харилцах арга барилыг сурч байдаг. Тиймээс та хүүхэддээ ном сонгохдоо үгийн сонголт сайтай, орчуулга, найруулга сайтай, мэргэжлийн түвшинд бичигдсэн, хэвлэгдсэн номыг авч уншиж өгч байгаарай.
6. Хэл бичгийн суурь бат бөх тавигдна. Үг үсгийн сонголт, найруулга сайжирч байдаг.
7. Логик сэтгэлгээ хөгждөг. Учир шалтгааны талаар ойлголттой болдог. Үлгэрт гарч буй зүйлсийг өөрийн амьдрал дээр хамааруулан төсөөлж чаддаг болдог.
8. Үгээр учирлан тайлбарлахад ойлгодог болно. Ямар нэгэн өөрчлөлтөд хүүхэд бэлэн биш байх үед ижил төстэй зүйлсээр жишээ татан зүгээр болохыг тайлбарлахад амархан ойлгодог болдог.
9. Анхаарал төвлөрөх чадвар болон хүмүүжилд нөлөөлдөг. Бага насныхан анхлан ном уншихад сууж төвлөрч чаддаггүй бөгөөд уншлагын дундуур тэвчээр алддаг. Харин яваандаа аажмаар суух хугацаа нь нэмэгдэж, номыг дуустал нь уншуулдаг болдог бөгөөд анхаарал төвлөрөх хугацаа нь олон дахин давталттай уншсаны эцэст уртасч, ой санамж сайжирч, хүмүүжил тэвчээртэй болж сургуульд орох насандаа аль хэдийнэ сууж сурсан байдаг байна.
10. Ном унших дуртай болдог. Бага наснаас нь ном уншиж өгснөөр хүүхэд номыг уншихаасаа төвөгшөөхгүй харин дуртай зүйл нь болж хувиран тоглоом, зурагт гэсэн зүйлсээс илүүтэйгээр номыг сонгодог болдог.

Ингээд эцэг эхчүүд та бүхэн хүүхэддээ ном уншиж өгснөөр хүүхдийн тань ирээдүйн амьдрал нь хялбар болох арга барилуудыг суралцдаг байна. Оройтоогүй дээр нь амжиж ном уншиж аз жаргалыг мэдрээрэй!

 

Ц. Хулан