ТОСК, МЗХ хамтран залуусыг орон сууцжуулна

Монголын залуусын өмнө тулгамдаж байдаг гол асуудлууд гэхээр ихээхэн урт дараалал үүснэ. Гэхдээ үүн дундаас нэн тэргүүнд ажлын байр, амьдрах орчин гэдэг өдрийн бодол, шөнийн зүүд болж байна.

Залуучууд сургуулиа төгслөө. Дараа нь ажилтай болох хэрэгтэй. Тэр ажил нь хөдөлмөрийг нь үнэлж чаддаг, нийгмийн баталгааг нь хангаж чаддаг байх юм бол бүр ч аз завшаан болно. Ингээд нэг юм ажилтай орлоготой болоод ирэхийн цагт өөрийн гэсэн гал голомттой болж эцгийн гэрээс гал таслахыг хүн бүр хүснэ. Гэвч энэ тэмүүлэл бэл бэнчин муутай, бор зүрхээрээ зүтгэж байгаа залуучуудын хувьд хөөс болон замрхан одох нь бий.

Тэгвэл Төрийн орон сууцны корпораци болон Монголын Залуучуудын холбоо хамтран залуучуудын энэхүү асуудлыг боломжийн хэрээр шийдвэрлэх, дэмжих зорилгоор Буянт-Ухаа-2 хорооллын 50 ширхэг байрыг сонгон шалгаруулалтад тэнцсэн залууст хувиарлахаар боллоо.

Өөрөөр хэлбэл, Чингис бондын санхүүжилтээр баригдаж, зах зээлийн өртгөөс хямд үнээр борлуулагдах Буянт-Ухаа-2 хорооллоос 50 квотыг Төрийн орон сууцны корпораци, Монголын Залуучуудын Холбоонд хувиарлан өгч байгаа юм. Өнөөдөр дээрх хоёр байгууллагын төлөөлөл хамтран ажиллах санамж бичигт гарын үсэг зурснаар уг ажил хүчин төгөлдөр болж байна.

Буянт-Ухаа-2 хорооллын орон сууцны нэг метр квадратын үнэ нь 1.350.000 төгрөг байх бөгөөд тус орон сууцанд байр авах гэсэн иргэдийн эрэлт хэрэгцээ их байдаг учраас Монголын Залуучуудын Холбоонд ийнхүү квот олгож байгаа нь залуус, залуу гэр бүл рүү чиглэсэн дорвитой дэмжлэгүүдийн нэг юм.

Буянт-Ухаа-2 хороололд нийт 48 ширхэг барилга баригдаж байгаа бөгөөд эхний ээлжинд буюу энэ оны 10-р сарын 30-нд 1500 айлын 30 байрыг ашиглалтад оруулахаар ажиллаж байгаа юм байна.

Харин Монголын Залуучуудын Холбоонд хувиарласан 50 квотод чухам хэнийг хамруулах вэ гэдэг сонгон шалгаруулалтыг Монголын Залуучуудын Холбоо зохион байгуулна. Тодруулбал, Монголын Залуучуудын Холбооны бүх шатны салбар нэгж байгууллагууд болон идэвхтэн гишүүд дунд шалгаруулалт явуулж, тодорхой шалгуурт тэнцсэн залуусын нэрсийг Төрийн орон сууцны корпораци руу явуулснаар квотын хувиарлалт хийгдэнэ.