Ерөнхий сайд хэлэхдээ “Вакцин үйлдвэрлэж байгаа бүх улсын Засгийн газрын тэргүүн нартай ярьж, ихэнх Ерөнхий сайдтай нь утсаар ярилцсан. Бараг 10-аас дээш удаа бичиг явуулж, миний бие гадаад яамыг алгасаал өдөржин, шөнөжин Элчин сайдуудтай ярьж байна. Иргэд маань нэг зүйлийг сайн ойлгохыг хүсч байна. ОХУ манай улсад туслахыг маш их хүсч байгаа. Гэхдээ ОХУ нийт хүн амаа вакцинжуулах ажил дөнгөж 10 хувьтай байгаа. Тиймээс дотоодын хэрэгцээгээ хангах зайлшгүй шаардлага бий. Миний бие ОХУ-аас Монгол Улсад суугаа Элчин сайдтай 5-6 удаа уулзсан. Элчин сайд “Монголын вакцинжуулалт атаархмаар болж байна” гэж байсан. Тиймээс иргэд олон нийт маань энэ асуудлыг наанатай, цаанатай бодоорой.
Хоёрт бид Энэтхэг улсаас АстраЗенека вакцинаас дахин 300 мянган тунг авахаар гэрээ хэлэлцээр хийгээд явж байсан. Гэтэл Энэтхэгт амаргүй нөхцөл байдал үүсч, АстраЗенека вакциныг экспортод гаргах боломжгүй болсон. Солонгос улсын вакцинжуулалт мөн л 10 хүргэхгүй хувьтай явж байна. Японтой ярьж байна, Ерөнхий сайд айлчилж вакцин авчрах асуудлыг хүртэл ярьсан. Мөн тус улсад вакцинжуулалт хангалттай хэмжээнд хүрээгүй байна. Ийм нөхцөлд бид аль вакциныг сонгохоос илүү аль нь олдож байна вэ гэдэг нь илүү үнэ цэнэтэй байгаа юм.
Монгол Улсын Засгийн газар олон улсын КОВАКС хөтөлбөрт хамрагдаж байгаа. Бидэнд ирсэн дарааллын дагуу явсан бол долдугаар сарын 15-наас вакцинжуулалт эхлэх байсан. Иргэн та вакцин хүлээж болно. Магадгүй таны хүлээж байгаа вакцин найм, есдүгээр сараас ирж, та тэр хүртэл хүлээх эрсдэлтэй гэдгийг хэлье. Тиймээс одоо байгаа энэ боломжоо ашиглах нь иргэн таны эрүүл мэндэд ч хэрэгтэй, Монгол Улсын хувьд бусад иргэддээ халдвар тараахгүй байх эрсдэлийг бууруулах гэдэг агуулгаараа цар тахлыг намжаахад хэрэгтэй. Мөн хоёр тун вакциндаа хамрагдсан иргэдэд агаарын хилээс эхлээд чөлөөтэй зорчуулах дэлхийн нийтийн стандартууд тавигдаж байна. Манай улс ч ийм стантдарт тавихаас өөр гарцгүй. Тиймээс одоо байгаа вакциныг хийлгэх нь цаг хугацааны хувьд эрсдэлгүй. Хоёр дахь тунг хийлгэсний дараа 14-21 хоногт дархлаа бүрэн тогтоно гэж байгаа учраас аль болох л хугацаа хожиж, түрүүлж хамрагдах нь илүү тустай. Иргэдээ хүчээр шаардаж вакцин хийлгэхгүй. Гол нь улс хамгийн үнэтэй, хамгийн удаан судлагдсан вакцинуудыг санал болгож байгаа. Аль болох богино хугацаанд вакцинжуулалтыг хийж байж л иргэдийн эрүүл мэндийг хамгаалж, эдийн засгаа сэргээж чадна. Харамсалтай нь вакцинжуулалтаас өөр ямар гарц байхгүй. Вакцингүй үед хөл хорио үр дүн өгч байна. Гэхдээ байнга хөл хорьж чадахгүй. Хэдий иргэд шүүмжилж байгаа ч хөл хорионы хугацаанд иргэн бүрдээ боломжит мөнгө өгөөд хөл хорьсон улс дэлхийд хаана ч алга. Бид байгаа бүх боломжит хувилбарыг цаг алдалгүй авахыг хүсч байна.
Засгийн газрын 100 хоног тавдугаар сарын 9-нд болно. Энэ зуу хоногоо бид вакцинжуулалтаа татан авсан, дарлаажуулалтад зарцуулсан гэж дүгнэж болно. Нийтдээ 4.2 сая вакцин татан авчирсан байна. Гэхдээ үүний цаана маш олон процесс, хүндрэл гарсан шүү. Дотоодынхоо хэрэгцээнээсээ илүүчлээд бидэнд дэм болсон улс оронд манай улс, нийт ард түмнээрээ талархах учиртай. Асуудал амаргүй байгаа учраас вакцины нийлүүлэлт дунд нь хэсэг тасарсан. Хөл хорио тавьж, вакцинжуулалтаа идэвхжүүлээгүй байсан бол тохиолдлын тоо өдөрт 4000 руу орох эрсдэлтэй нүүр тулсан. Энэ бүхнийг амжилттай даван туулж байна, туулна ч гэж итгэж байна. Өнөөдрөөс орон нутаг вакцинжуулалтыг идэвхжүүлэхээр нийлүүлэлтийг хийж байна. Цаг алдахгүй хамтдаа даван туулахын төлөө иргэн бүхэн дор бүрнээ хичээхийг хүсье.
Ерөнхийлөгчийн ээлжит сонгуультай зэрэгцэн цар тахал, вакцинжуулалтыг улстөржүүлж, нийгмийн хөөсрөлийг бий болгож байна. Энэндээ ЭМ-ийн салбарын ажлаа хийгээд явж байгаа ажилтан албан хаагч, онцгой байдлын албан хаагчийг, вакцинжуулалтыг оролцуулж байна. Улстөрчид нэг ч вакцин авчирч, нэг ч вакцин үйлдвэрлэж чадахгүй байж, нэмэр болохоосоо илүү битгий гай болооч ээ. Зарим вакцины татан авалтад манай зарим улстөрчдийн хариуцлагагүй асуудал нөлөөлсөн. Миний хувьд цар тахлын хажуугаар улстөржихгүй явах гэж хичээж ажиллаж байна. Гэхдээ би тэвчээд дуугүй яваад байдаг зан харилцаатай хүн биш. Шаардлагатай бол тэр гишүүдийг би зарлана. Энэ цаг үед ард түмний эрүүл мэнд, эрүүл мэндийн системийн эсрэг, хариуцлагагүй мэдэгдэл хийж, энд тэнд буруу мэдээлэл өгч байгаа нь өөрөө эх орноосоо урвасан үйлдэл. Үүнийг зарим нэг улс төрийн алиа салбадай нарт хатуу анхааруулъя. Удахгүй цар тахал гайгүй болохоор хэлэх ёстой газар нь хэлнэ. Иргэд маань улс төрийн хөөсрөлд автахгүйгээр урдаа тавьсан зорилгоо л хамтдаа хэрэгжүүлэх нь чухал гэдгийг хэлэхийг хүсч байна” гэлээ.
