Цагаан ордны эрүүл мэндийн ахлах зөвлөх, доктор Энтони Фаучи цар тахлын дараа амны хаалт нь амьсгалын замын халдварт өвчнүүд идэвхждэг улирлуудад зайлшгүй зүүх шаардлагатай тогтмол хэрэглээ болж үлдэх магадлалтай гэх байр суурь илэрхийллээ.
Тэрээр ням гаригт “NBC” телевизийн “Meet the Press”-т ярилцлага өгөх үеэрээ “Хүмүүс амны хаалт зүүж хэвшсэн гэж бодож байна. Хэрэв амьсгалын замын өвчлөлийн талаарх дата өгөгдлийг харвал хүмүүс “COVID-19” цар тахлаас урьдчилсан сэргийлэх зорилгоор амны хаалт зүүж хэвшсэнээр энэ жил томуугийн улиралд ханиад хүрсэн тохиолдол бараг л бүртгэгдсэнгүй. Тиймээс цаашид томуугийн улиралд амьсгалын замын өвчлөлөөс урьдчилан сэргийлэх зорилгоор амны хаалт тогтмол хэрэглээ болох болов уу” гэжээ.
АНУ-ын Өвчний хяналт, урьдчилан сэргийлэх төв “COVID-19”-ийн эсрэг вакцины хоёр тунд хамрагдсан иргэд гадаа цөөн тоогоор цуглаж амны хаалтгүй дасгал хийх боломжтой гэж зөвлөсөн. Гэсэн ч халдварын тархалтаас урьдчилан сэргийлэх зорилгоор вакциндаа бүрэн хамрагдсан ч олон нийтийн газраар зорчихдоо зайлшгүй амны хаалтаа зүүхийг анхааруулж байгаа юм.
Харин АНУ-ын Хүнс, эмийн хяналтын газрын комиссар асан, доктор Скотт Готлиб энэ талаар “АНУ яг одоо хүмүүст хэвийн амьдралдаа эргэн орох боломжийг олгох цэг дээрээ ирээд байгаа. Тиймээс олон нийтийн газар болон нийтийн үйл ажиллагаанд хязгаарлалт тавихаа больж, хүмүүсийг гадуур гарахыг уриалах нь зүйтэй. Халдварын тархалт бага, вакцинжуулалтын явц сайн байгаа мужуудад хязгаарлалтын арга хэмжээнүүдийг зөөлрүүлэх хэрэгтэй. Ковид алга болохгүй. Тиймээс бид түүнтэй хамт амьдарч сурах хэрэгтэй. Гэхдээ вакцин хийлгэсний үр дүнд хүмүүс урьд өмнө халдвар авснаар дархлааны үр дүнд эрс багассан. Вакцинжуулалт болон өмнө нь олон хүн халдвар аваад эдгэрсний үр дүнд эрсдэл эрс буурсан” гэжээ.
АНУ өнөөдрийн байдлаар нийт хүн амынхаа 45 хувийг “COVID-19”-ийн эсрэг вакцины нэг тун, 33.9 хувийг хоёр тунгаар вакцинжуулаад байна.
