АН-ын дарга М.Тулгат: Ирэх даваа гаригаас Ерөнхийлөгчийн сонгуульд нэр дэвшигчдийн сурталчилгаа эхэлнэ. АН-ын зүгээс Ерөнхийлөгчийн сонгуульд өрсөлдөх МАН, ХҮН-ын нэр дэвшигчдэд хандан уриалга гаргаж байна. Цар тахалтай хүнд нөхцөл байдалд сонгууль болох учраас мөнгө цацсан үрэлгэн сонгууль болгохгүй байя. Цар тахалтай, дээр хугацаа богино учраас бүх аймгаар явж чадахгүй. Тиймээс нэр дэвшигчид орон нутгуудад уулзалтуудаа хамтарсан байдлаар хийх, хэвлэл мэдээллийн хэрэгслээр бодлогын мэтгэлцээнийг таван удаа явуулж, ард түмэнд хүртээмжтэй байдлаар мэдээллийг өгөх урилгыг хүргүүлж байгаа. Сурталчилгааны материал, самбар, тараах материалыг нэр дэвшигчид нэгдсэн байдлаар зохион байгуулж, хамтад нь тараах саналыг өрсөлдөгч намууддаа хүргүүлж байна.
-АН-ын Ерөнхий нарийн бичгийн дарга Ч.Өнөрбаяр: АН-ын тамга, бүртгэлтэй холбоотой маргааныг шүүх эцэслэсэн. Дээд шүүхээс Ц.Туваан нь хууль зүйн хувьд АН-ыг төлөөлөх боломжгүй, тамга тэмдэг нь хууль зүйн хувьд хүчин төгөлдөр биш гэж үзсэн учраас тамганы маргаан эцэслэгдсэнийг үүгээр мэдэгдэж байна.
Энэ мэдээллийн үеэр СЕХ-ны хар машинтай холбоотой баримтыг дэлгэлээ.
2020 оны сонгуулийн үед компьютер графикчаар ажиллаж байсан иргэн Ган-Очир АН, МАН-ын нэр бүхий хүмүүс санал тоолох хар машиныг хакердах ажлыг зохион байгуулж, сонгуулийг луйвардаж, төрийн эрхийг хууль бусаар авсан байх магадлалтай дуу, бичлэгийг үзүүлэв. Энэхүү үйл ажиллагаанд АН-ын гишүүн, Ерөнхийлөгч Х.Баттулгын зөвлөх Пүрэвдаваа, Нүрзэд, МАН-ын Ерөнхий нарийн бичгийн дарга Д.Амарбаясгалан, Нийслэлийн МАН-ын дарга Д.Сумъяабазар, МАН-ын гишүүн Гангамөрөн болон бусад хүмүүс оролцож, СЕХ-ны санал тоолох хар машины IT инженер Мөнхбат гэдэг хүн 175 тэрбум төгрөгийн хахууль өгч УИХ болон орон нутгийн сонгуулийг луйвардаж, төрийн эрхийг хууль бусаар авсан гэдэг мэдээллийг иргэн Ган-Очир өглөө.
Иргэн Ган-Очир 2020 оны УИХ-ын сонгуулийн дараагаас энэ асуудлыг гарган тавьж, СЕХ-ын IT ажилтнууд улс төрийн намын нэр бүхий хүмүүстэй хамтран төрийн эрхийг хууль бусаар авсан гэдгийг ярьж эхэлснээсээ болж хууль байгууллагад шалгагдаж эхэлсэн байна. Ингээд зургаан сарын өмнө хохирогч байх гэх шалтгаанаар хуулийн байгууллагаас уг хэргийг хаасан байна. Гэхдээ Ган-Очирт ирэх дарамт шахалт хэвээр учраас олон нийтэд энэхүү мэдээллийг дахин цацаж байгааг хэлсэн юм.
Иргэн Ган-Очирын мэдээллийн дагуу хууль хяналтын байгууллага дахин энэ хэргийг шалгаж, 2021 оны Ерөнхийлөгчийн сонгуульд ийм явдал давтагдахгүй, гаргахгүй байхад анхаарч, СЕХ-ноос албан ёсны тайлбар хийхийг М.Тулгатай даргатай АН-аас шаардлаа.
