Ерөнхийлөгчид нэр дэвшигч нар Хөрөнгө орлогын мэдүүлгээ АТГ-т хүргүүлэх хуулийн заалттай. Тус хуулийн дагуу гурван нэр дэвшигч ХОМ-ээ АТГ-т хүргүүлж, АТГ бүртгэсэн байна.
- Тус ХОМ-ээс харвал хамгийн их орлоготой нь МАН-аас нэр дэвшигч У.Хүрэлсүх байна. Түүний жилийн орлого нь 182.7 сая төгрөг бол АН-аас нэр дэвшигч С.Эрдэнийнх 11.5 сая, “Зөв хүн электорат”-аас нэр дэвшигч Д.Энхбатын орлого 132 сая төгрөг байна. Харин С.Эрдэнийн гэр бүлийн орлого 196.4 сая төгрөг байгаа бол У.Хүрэлсүхийн гэр бүлийн орлого 0 төгрөг байна.
- С.Эрдэнэ 391 сая төгрөгийн үнэ бүхий хоёр амины орон сууцтай, зуслангийн байргүй гэж мэдүүлжээ. Тэрээр УИХ-ын гишүүн байхдаа хамгийн сүүлд 2019 онд ХОМ бөглөхдөө 687 сая төгрөгийн үнэ бүхий үл хөдлөхтэй гэж мэдүүлж байсан бол ийнхүү жилийн хугацаанд 300 орчим сая төгрөгөөр буурсан байна.
- Д.Энхбат 900 сая төгрөгийн үнэлгээ бүхий нэг орон сууц, нэг зуслангийн байртай бол У.Хүрэлсүхийн орон сууц, зуслангийн тус бүр нэг байр 162.5 сая төгрөгийн үнэлгээтэй байна.
Тэдний эзэмшдэг газрын хамгийн өндөр үнэлгээтэй нь Д.Энхбатынх. Тэрээр 0.07 га бүхий гурван газраа 90 сая төгрөгөөр үнэлжээ. Харин С.Эрдэнэ 11 орчим га газраа 36 сая төгрөгийн үнэлгээтэй гэж мэдүүлсэн байна. У.Хүрэлсүх 1.5 га бүхий ашиглах эрхийн газартай ба үнэлгээ нь 7.5 сая төгрөг хэмээн мэдүүлжээ.
