– \”Намрын ногоон өдрүүд 2015” үзэсгэлэн худалдаа Мишээл экспод үргэлжилж байна –
Хүнс, хөдөө аж ахуйн яамнаас жил бүр уламжлал болгон зохион байгуулдаг \”Намрын ногоон өдрүүд 2015” нэгдсэн арга хэмжээ \”Монгол хүнс-Органик хүнс”, \”Алтан намар” уриан дор Мишээл экспо төвд үргэлжилж байна.
Өнөөдрийн байдлаар 21 аймаг, нийслэлийн нийт 350 гаруй аж ахуйн нэгж өөрсдийн брэнд болсон бүтээгдэхүүнээр оролцож байна. Тухайлбал, Сэлэнгэ аймаг талх, утсан загас, хүнсний ногоо, зөгийн балаар оролцож байгаа бол Хөвсгөл аймаг жимсний чанамал, эмийн ургамлын брэнд бүтээгдэхүүнүүдээ нийслэлчүүддээ дэлгэжээ. Мөн Ховд, Архангай, Булган аймгууд ааруул, зөөхий, шар тос зэрэг уламжлалт бүтээгдэхүүнээрээ оролцож байна. Бүтээгдэхүүн үйлдвэрлэгчдийн хувьд жил бүр бүтээгдэхүүний нэр төрлөө олшруулах, түүнийгээ худалдан авагч нартаа хүргэхийг зорьдог болохоо онцолж байлаа.
Б.Бөх-Амгалан: Сарлагийн шар ааруул борлуулалт сайтай байна
Энэхүү үзэсгэлэн худалдаанд оролцохоор анх удаа зорьж ирлээ. Урьд жилүүдэд дандаа баруун бүсийн үзэсгэлэн худалдаанд оролцдог байсан. Үзэсгэлэн худалдаа өчигдрөөс эхэлсэн гэхэд борлуулалт сайтай байна. Манайх нийтдээ 11 төрлийн бүтээгдэхүүнтэй оролцохоор ирсэн. Тухайлбал, хорхой ааруул, чипсэн ааруул, ховдын айргын тос, хонь,ямааны тос, сарлагийн шар ааруул, ямаааны ааруул, чацарганы өтгөрүүлсэн шүүс зэрэг бүтээгдэхүүнтэй оролцож байна. Худалдан авагчдын хувьд Ховдын хөх тарианы гурил, сарлагийн шар ааруул, айргийн тос зэрэг бүтээгдэхүүнийг илүү сонирхож байгаа бөгөөд орон нутгийн үнээр зарагдаж байгаа. Бидний хувьд байгалийн эко бүтээгдэхүүнийг үйлдвэрийн анхдагч үнээр борлуулж байна.
А.Сэргэлэнцэцэг : Энэхүү үзэсгэлэн худалдаа шинэ бүтээгдэхүүн танилцуулах боломж олгодог
Манай компани \”Намрын ногоон өдрүүд” нэгдсэн арга хэмжээнд анх зохион байгуулагдсан жилээс нь эхлэн оролцсон. Ингэж оролцохдоо шилдэг бүтээгдэхүүний шагналыг хэд хэдэн удаа хүртэж байсан. Манай компанийн бүтээгдэхүүнүүд хэрэглэгчдэд хүрчихсэн учраас үзэсгэлэн худалдаанд оролцоход ер нь бол борлуулалт сайн байдаг. Харин шинэ нэр төрлийн бүтээгдэхүүнээ олонд танилцуулах томоохон боломжийг олгодог гэж боддог. Тийм ч учраас бид жил бүр шинээр гаргасан бүтээгдэхүүнээ худалдан авагчдад таниулах зорилгоор оролцдог. Энэ жил манай компани ходоодны шархтай хүмүүст зориулсан ургамлын бэлдмэлийг шинээр танилцуулж байна.
Н.Тодорхойсүрэн: Суулгацаа дунджаар 1500 төгрөгөөр борлуулж байна
Би Сэлэнгэ аймгийн Баянгол сумаас ирсэн. Энэ жилийн үзэсгэлэн худалдаанд зөгийн бал, тарьц суулгацтайгаар оролцож байна. Нийт 11 төрлийн суулгац авчирсан. Үүнээс найман төрлийн 2-3 настай гоёлын суулгац байна. Жишээлбэл, хавар гэхэд бүүл, гүйлс, голт бор зэрэг суулгацаас цэцэг гарна. Харин таримал хэлбэрээр үржүүлэх бол агч, Хараагийн бургас, улиас зэргийг сонгож болно. Мөн говьд тарих боломжтой мөнгөлөгжигд гэдэг модны суулгацтайгаар оролцож байна. Суулгацаа дунджаар 1500 төгрөгөөр борлуулж байна.
Намрын ногоон өдрүүд нэгдсэн арга хэмжээ өнөөдөр \”Амтат талх, алаг бялуу” өдөрлөгөөр үргэлжиллээ. Өдөрлөгийн үеэр талх, гурилан бүтээгдэхүүний сурталчилгаа, амталгаат худалдаа явагдсан юм. Харин маргааш буюу аравдугаар сарын 1-ний өдөр \”Халуун зайдас, хачиртай хиам” өдөрлөг болно.
