Жолоочийн даатгалын тухай хуулийг хэрэгжүүлэх зохион байгуулалт буруу байгаагаас даатгалын хураамжийн орлогоос зам тээврийн ослыг бууруулах, замын хөдөлгөөний аюулгүй байдлыг хангахад чиглэсэн ажил огт хийгдээгүй байна гэж УИХ-ын дэд дарга Т.Аюурсайхан мэдээлэв.
Тэрээр Жолоочийн хариуцлагын даатгалын тухай хуулийн төсөл өргөн барихаар ажиллаж байгаа юм. Т.Аюурсайхан гишүүн дараах мэдээллийг хуваалцав:
-Жолоочийн хариуцлагын албан журмын даатгалыг ашгийн төлөө хуулийн этгээд эрхэлж байна. Ашгийн төлөө хуулийн этгээдийн үндсэн зорилго нь ашиг олох юм. Харин Жолоочийн даатгалын тухай хуулийн зорилт нь даатгалд хамруулах, хохирогчийн эрх ашгийг хамгаалах.
Хохирогчийн эрх ашгийг хамгаалах, хохирлын нөхөн төлбөр олгох ажлыг ашгийн төлөө хуулийн этгээд эрхлэх нь хохирогчид нөхөн төлбөр олгохоос үндэслэлгүйгээр татгалзах, учирсан хохирлыг 100 хувь олгохгүй байх зэрэг асуудал ихээхэн гардаг.
Жолоочийн даатгалын тухай хууль хэрэгжсэн арван жилийн хугацаанд жолооч нараас нийт 230 тэрбум төгрөгийн даатгалын хураамж төвлөрүүлжээ. 121 тэрбум төгрөгийн нөхөн төлбөр олгож, компаниуд 108 тэрбум төгрөгийн ашиг олжээ.
2020 онд дээд тал нь даатгалын зөвхөн нэг компани 6.1 тэрбум төгрөгийг жолооч нараас хурааснаас 1.9 тэрбум төгрөгийг нөхөн олговорт өгч, 4.2 тэрбум төгрөгийн ашиг олсон байна.
2020 оны байдлаар зам тээврийн осол гаргасан жолоочийн тоо 27 983 байгаа ба ослын тоо сүүлийн есөн жилд буураагүй байна. Мөн жолоочийн хариуцлагын даатгал хэрэгжсэн сүүлийн арван жилд 4 463 хүн зам тээврийн ослоор нас барж, 36 162 хүн хөдөлмөрийн чадвараа алджээ.
Жолоочийн даатгалын тухай хуулийг 2011 оны арван нэгдүгээр сард баталж, 2012 оны нэгдүгээр сарын 1-нээс хэрэгжүүлсэн. Хуулийн зорилго нь зам тээврийн ослын улмаас иргэн амь нас, эрүүл мэнд, эд хөрөнгөөр хохирч үлдэхгүй байх, хохирлыг санхүүжүүлэх тогтолцоог бий болгоход чиглэсэн юм.
