Дипломат албан гадаад паспорт олгох, эзэмших, хадгалах журмыг өнгөрсөн жил Засгийн газрын тогтоолоор шинэчлэн баталсан.
Шинэчилсэн журмыг хэрхэн хэрэгжүүлж буй талаар болон төрийн албан тушаалтнуудын зайлшгүй мэдэж байх ёстой зүйлийн талаар Гадаад харилцааны сайд Б.Батцэцэг дараах мэдээллийг өглөө.
Гадаад харилцааны сайд Б.Батцэцэг “Шинэчилсэн журмаар хариуцлагыг нэмэгдүүлэх, олгох шалгуурыг өндөрсгөж, паспортын хадгалалт, ашиглалтад онцгой анхаарч олон зохицуулалт тусгасныг манай яам мөрдөн ажиллаж байна. Тухайлбал, зөвхөн албан ажлын шугамаар дипломат паспорттой зорчих, энэ тухай нотлох баримтыг Монгол Улсын болон гадаад улсын хилийн боомтод шалгуулах, паспорт эзэмшигч албан хаагч томилолтоор ажиллаад Монгол Улсын хилээр орж ирэхдээ хилийн боомтод паспортыг хураан авч, Гадаад харилцааны яаманд ирүүлж байхаар тусгасан нь хэрэгжсээр байна.
Хураан авсан паспортыг тусгай журмын дагуу хадгалж байгаа юм. Түүнчлэн паспорт эзэмшигч төрийн албан хаагч томилолтоор ажиллах тухай бүрд харьяа байгууллагын хүсэлтийг үндэслэж Гадаад харилцааны яамнаас түр олгож байх зохицуулалттай болсон. Үүнийг төрийн албан хаагчид мэдэж байх шаардлагатай.
Хилийн боомтод дипломат албан паспорт хураалгахаас татгалзсан тохиолдолд дахин олгохгүй байх онцлог заалт орсон. Дипломат албан гадаад паспортын ашиглалт, хадгалалтад хяналт тавих үйл ажиллагааг чангатгах чиглэлээр Гадаад харилцааны үе шаттай арга хэмжээ авч байгаа.
Засгийн газрын тогтоолыг үндэслэн ажлаасаа халагдсан, чөлөөлөгдсөн, өөр албанд шилжсэн албан тушаалтнуудын нийт 806 дипломат албан паспортыг хүчингүй болгож, олон улсын гэрээгээр хүлээсэн үүрэг, журамд тусгайлан заасан үүргийн дагуу олон улсын эрүүгийн цагдаагийн байгууллагын цахим мэдээллийн санд холбогдох мэдээллийг хүргүүлсэн” гэлээ.
