Одоо байгаа вакцинууд COVID-19-ийн “Omicron” хувилбарын эсрэг дархлаа тогтоохоор байгааг Дэлхийн Эрүүл Мэндийн Байгууллага мэдээллээ. Мөн халдвар авсан хүмүүст хөнгөн шинж тэмдэг илэрч байгааг онцолсон байна.
Лхагва гарагт шинэ хувилбар анх бүртгэгдсэн ӨАБНУ-д өдөрт бүртгэгдэх халдварын тохиолдлын тоо өмнөх өдрөөс хоёр дахин нэмэгдэж, 8000 давжээ. Тус улсын иргэдээс 11 дүгээр сард авсан сорьцуудын 74 хувьд “Омикрон” хувилбар илрээд байгаа аж.
БНСУ-д анх удаа “Omicron” хувилбарын таван тохиолдол бүртгэгдсэн байна. Өнөөдрийн байдлаар тус улсад цар тахал эхэлснээс хойших хамгийн олон буюу хоногт 5120 шинэ тохиолдол бүртгэгджээ. БНСУ-д гадаадаас ирэх зорчигчдыг 10 хоног тусгаарлах шийдвэр гаргаад байна.
Үүнээс гадна АНУ-д мөн “Omicron” хувилбарын анхны тохиолдол бүртгэгдлээ. АНУ-ын Халдварт өвчин судлалын үндэсний төвийн тэргүүн Энтони Фаучи “Халдвар илрэх нь зөвхөн цаг хугацааны асуудал байсан” гэж мэдэгдлээ.
Мөн Өмнөд Африк руу зорчихыг хориглосон шийдвэр түр зуурынх гэдгийг тодотгосон байна.
