Спортын салбарын оны шилдэг тамирчдыг шалгаруулдаг “Бөртэ-Чоно” ёслолын ажиллагаа болж өндөрлөлөө.
МУГТ, Хөдөлмөрийн баатар М.Уранцэцэг “Токио-2020” олимпын наадмаас хүрэл медаль хүртсэн амжилтаараа 2021 оны шилдгийн шилдэг тамирчнаар шалгарч шилжин явах цомын эзэн болов. Мөн тэрбээр “Шилдэг эмэгтэй тамирчин”-аар шалгарч “Бөртэ-Чоно” шагнал хүртлээ.
Тэрбээр “Маш их баяртай байна. Шилдэг тамирчин, шилдгийн шилдэг тамирчин болсондоо маш их баяртай байна. Би өмнө нь 2013 оны “Бөртэ-Чоно” ёслолоор шилдгийн шилдэг тамирчин болж байсан. Өнөөдөр энэ шагналыг хоёр дахь удаагаа хүртлээ.
Өнгөрч буй 2021 он амжилт бүтээлээр дүүрэн байлаа. Дэлхийн аварга шалгаруулах тэмцээнээс шагнал хүртсэн, үүний дараа олимпоос хүрэл медаль хүртлээ. Хөдөлмөрийн баатар гэх эрхэм хүндтэй шагнал авлаа. Ингээд оны төгсгөлд “Бөртэ-Чоно” шагналын эзэн, шилдгийн шилдэг тамирчин боллоо. Үнэхээр амжилт арвин байлаа” хэмээн сэтгэгдлээ хуваалцав.
Мөн оны шилдэг эрэгтэй, эмэгтэй тамирчин шалгаруулснаас гадна “Оны шилдэг тамирчин”-аар хоёр хүнийг шалгаруулж “Бөртэ-Чоно” хүртээв. Уг шагналыг 2020 зуны олимпын жүдо бөхийн эрэгтэйчүүдийн 73 кг жинд хүрэл медаль хүртсэн ОУХМ Ц.Цогтбаатар, Чөлөөт бөхийн эмэгтэйчүүдийн 53 кг-д хүрэл медаль хүртсэн ОУХМ Б.Болортуяа нар “Шилдэг тамирчин”-аар шалгарлаа.
ОУХМ, жүдоч Б.Болортуяа “Тамирчин хүний эрхэм зорилго олимп, дэлхийн аварга болох. Энэ зорилгынхоо төлөө тууштай зүтгэж байхдаа “Бөртэ-Чоно” гэдэг хүндтэй шагнал хүртсэндээ маш их баяртай байна. Цаашид улам хичээж дэлхийн хэмжээний тамирчин болохын төлөө тэмүүлнэ.
Энэ жил манай чөлөөт бөхийн холбооны 60 жилийн ой тохиож байна. Энэ ойгоор олимпын арав дахь медалийг эх орондоо авчирсандаа сэтгэгдэл өндөр байгаа. Үе тэнгийн олон чадварлаг тамирчид төрөн гарч байгаа учраас илүү өрсөлдөөнтэйгээр хөгжиж, өсөн дэвжсээр амжилтаар арвин байх болно” гэв.
Пауэрлифтингийн шилдэг тамирчнаар МУГТ, Хөдөлмөрийн баатар Э.Содномпилжээ шалгарлаа. Мөн түүний дасгалжуулагч, багш МУГТ Д.Баттулга “Шилдэг дасгалжуулагч”-ын шагнал хүртэв.
Тэрбээр Монгол Улсын Хөдөлмөрийн баатар, гавьяат тамирчин Э.Содномпилжээгийн сүүлд оролцсон Гүржийн нийслэл Тбилис хотод болсон пара пауэрлифтингийн Дэлхийн аварга шалгаруулах тэмцээний талаар мэдээлэл өгөв.
Дасгалжуулагч Д.Баттулга “Сүүлийн тэмцээнд Содномпилжээ маань гурван оролт захиалсны хоёрыг тооцоогүй. Эхлээд 24ыг өргөсөн ч тооцоогүй учраас дахин хоёр килограмм нэмж захиалга өгсөн, үүнийг тооцсон. Гурав дахь захиалгыг 248-аар өгөхөөр тооцоолж байсан ч өрсөлдөгч 253 захиалахаар тооцоолол өгсөн.
Тийм учраас бид 248-аас 250 болгоод оруулж ирсэн, өргөсөн. Гэвч ямар нэгэн шалтгаанаар тооцоогүй. Өрсөлдөгч 251-ийг захиалаад өргөсөн ч адилхан тооцоогүй. Ингээд өрсөлдөгч хоёр дахь оролтоо 245-аар өргөснөөр түрүүлсэн. Тэмцээн маш хүнд байсан” хэмээн ярилаа.
