Ховд аймгийн Засаг даргад өрсөлдөж байсан тус аймгийн Засаг даргын орлогч Т.Дэлгэрсайхан нэрээ татаж, Ерөнхий сайдын ахлах зөвлөх бөгөөд Ажлын албаны дарга Э.Болормаа өрсөлдөгчгүй үлдлээ.
МАН-ын Удирдах зөвлөл өнгөрсөн долоо хоногт хуралдаж, Ховд аймгийн Засаг даргын томилгоог хэлэлцэхдээ Э.Болормааг нэр дэвшүүлэхийг 100 хувийн саналаар дэмжсэн. Гэвч Засаг даргыг сонгох, аймгийн Иргэдийн төлөөлөгчдийн хурлын VIII хуралдаанаар Иргэдийн Төлөөлөгчдийн Хурлын төлөөлөгч Н.Ганбат эсэргүүцэн, Засаг даргын орлогч Т.Дэлгэрсайханыг нэр дэвшүүлэх хүсэлтэй байгаагаа уламжилсан.
Тухайн үед МАН-ын бүлэг хурлыг орхин гарснаар Засаг даргыг сонгох санал хураалт болоогүй тул өнөөдөр үргэлжлүүлэн хуралдаж байгаа аж. Тэгвэл өнөөдрийн хуралдаанаар Т.Дэлгэрсайхан нэрээ татаж, Э.Болормаа үлдлээ. Ардчилсан нам цагийн завсарлага авчээ.
Монгол Улсын Засаг захиргаа, нутаг дэвсгэрийн нэгж, түүний удирдлагын тухай хууль
56.5.Засаг даргад нэр дэвшүүлэх ажиллагааг дараах журмаар явуулна:
56.5.1.иргэдийн Төлөөлөгчдийн Хурлын төлөөлөгч болон аймаг, нийслэл, дүүргийн иргэдийн Төлөөлөгчдийн Хурал дахь нам, эвслийн бүлэг, түүнчлэн иргэдийн Нийтийн Хуралд оролцогч дангаараа буюу хамтарч энэ хуулийн 56.3, 56.4-т заасан шаардлага хангасан хүнийг Засаг даргад нэр дэвшүүлэхээр санал гаргана;
56.5.2.энэ хуулийн 56.5.1-д заасан хүний талаар санал хураалт явуулж, Хуралд оролцсон иргэдийн, түүнчлэн нийт төлөөлөгчдийн олонхын санал авсан хүнийг Засаг даргад нэр дэвшүүлэх;
56.5.3.хэрэв санал хураалтаар хэн ч олонхын санал аваагүй бол хамгийн олон санал авсан хоёр хүний талаар дахин санал хураалт явуулж олонхын санал авсан хүнийг Засаг даргад нэр дэвшүүлэх;
56.5.4.нэр дэвшигч нь энэ хуульд заасан шаардлагыг хангасан байх.
56.6.Энэ зүйлийн 56.5-д заасны дагуу нэр дэвшүүлсэн хүнийг баг, хорооны Засаг даргаар сум, дүүргийн Засаг дарга, сум, дүүргийн Засаг даргаар аймаг, нийслэлийн Засаг дарга, аймаг, нийслэлийн Засаг даргаар Ерөнхий сайд томилно.
56.7.Дээд шатны Засаг дарга, эсхүл Ерөнхий сайд тухайн нэр дэвшигчийг томилохоос татгалзаж болно.
56.8.Энэ хуулийн 56.7-д зааснаар томилохоос татгалзсан тохиолдолд зохих шатны Хурал энэ хуулийн 56.5-д заасан журмаар дахин нэр дэвшүүлнэ.
56.9.Энэ хуулийн 56.8-д заасны дагуу дахин нэр дэвшүүлсэн хүнийг ажлын таван өдрийн дотор дээд шатны Засаг дарга, Ерөнхий сайд томилох үүрэгтэй.
Эх сурвалж: Ховд.мн
