Монголын тухай хамгийн анхны ил захидал 1898 онд хэвлэгдэж байжээ

Баярын өдрүүдэд хүмүүсийн харилцаанд гол үүрэг гүйцэтгэж, бусадтай харилцах нэгэн том соёл бол ил захидал илгээх соёл юм. Баяр ёслолын үеэр нэг нэгнээ хүндэлж, бичиг үсгийн соёлыг ч мөн бусдадаа түгээдэг энэ уламжлал өнөөдөр бараг мартагдсан гэж хэлэхэд болно. Харин өдгөө техник технологи өндөр хөгжсөн учраас гар утас, интернет, и-мэйл зэргийг ашиглан нэгэндээ цахим хэлбэрээр ил захидал илгээх нь элбэг болжээ. Харин өөрийн гараар ил захидал хийж, түүн дээрээ сэтгэлийн үгээ бичиж бусдадаа түгээх нь амьд харилцааны хамгийн том хэлбэр төдийгүй баярын уур амьсгалыг ч хамгийн их оруулдаг юм.  

Ил захидал нь нэг ба хоёр хуудастай байж болно. Хоёр хэсгээс бүрдсэн ил захидлын хуудсыг дугтуйнд хийж явуулна. Шуудангийн ил захидлын хуудсанд түүний зай талбайнаас хэтрэхгүй хэмжээний мэдээлэл, бичиг, ном хэвлэлээс хэсэглэн авсан зүйл, гар ба фото зураг наахыг зөвшөөрнө. Ил захидлын хуудасны хэмжээ нь захидлын дугтуйны стандартын хэмжээнд тохирсон байх бөгөөд дээд хязгаар нь 162х229 мм байна. Шуудангаар дамжуулж илгээх тохиолдолд ийм стандартын дагуу байх ёстой юм байна.

Манай улсад ил захидлын соёлыг \”Монгол шуудан\” хувьцаат компани өнөөг хүртэл түгээсээр байна. \”Монгол шуудан\” компани Үндэсний түүх соёл, зан заншил, байгаль, ан амьтан зэрэг төрөл бүрийн сэдвээр олон нэр төрлийн, өнгө дизайнтай, чанартай ил захидал, мэндчилгээг захиалгаар хэвлүүлэн борлуулдаг. Сонирхуулахад, Монголын тухай хамгийн анхны ил захидал 1898 онд хэвлэгдэж байжээ.

Интернэт, гар утас хөгжсөн өнөө үед хүн бүхэн дэлхийн аль ч улсад суугаа нэгэнтэйгээ хүссэн цагтаа холбогддог болсон. Харин энэ бүхэн хөгжөөгүй байхад хүмүүс  захидлаар хоорондоо харилцдаг байсан билээ.

Баярын уур амьсгалыг байгаа газраа бүрдүүлэх нь ердөө л таны итгэл сэтгэлээс хамаарна. Төсөөлөн бодох чадварын өчүүхэн хэлтэрхийг бүтээлч санаатай нийлүүлээд, жаахан цаг зав гаргахад л ариун цэврийн цааснаас хүртэл шинэ жилийн баярын ер бусын чимэглэл таны гараар бүтдэг гэдэгт та итгэх үү. Мэдээж юм элбэг болсон өнөө үед өөрөө чимэглэл хийж, биеэ зовоох хэрэггүй байх. Гэхдээ гэр бүлээрээ, хайртай хүмүүстэйгээ хамтраад ойр дотны хүмүүстээ өөрийн гараар ил захидал хийж, түүн дээрээ сэтгэлийн үгээ бичин өгөх гайхалтай санааг та бүхэнд танилцуулж байна. Ил захидал хийхэд ердөө л гоёмсог өнгийн цаас, сэтгэлийн үгээ бичих үзэг, хайч, цавуу хэрэгтэй. Ингээд та бүхэнд ил захидал хийх хамгийн энгийн аргыг хүргэе.