Хүн амын нягтаршлыг бууруулахын тулд Токио хотын төвөөс гарч буй гэр бүлд хүүхдийн тоогоор 1 сая иен өгнө гэж Японы Засгийн газраас мэдээллээ.
Том хотын төвлөрлийг сааруулж бусад хот тосгодын хүн амыг тэнцвэржүүлэх зорилготой уг арга хэмжээний хүрээнд хүүхдийн тоогоор 300 мянган иен өгдөг байсан ба ирэх дөрөвдүгээр сараас огцом нэмж байгаа аж.
Арлын орны нийслэлийн хүн ам өнгөрсөн онд анх удаа буурсан нь КОВИД-19 цар тахалтай холбоотой байж магадгүй ба хүн амын нягтаршлыг бууруулах ажлаа үргэлжлүүлэх хэрэгтэй гэж эрх баригчид үзэж байна.
Нэг гэр бүлд дээд тал нь 3 сая иен өгөх бөгөөд Токио хотын төвийн 23 дүүрэгт амьдардаг гэр бүлүүд хамрагдах боломжтой. Санхүүгийн тэтгэмж авахын тулд өрхүүд Токио хотын төвийн бүсээс нүүн суурьших шаардлагатай ба уулархаг бүс нутагт амьдрахаар бол мөнгөө бэлнээр авч болно гэв.
Тус улсын нийт том хотуудын 80 хувь нь буюу 1300 нь энэхүү тэтгэмжийг олгож эхэлсэн. Цар тахлын үед бий болсон зайнаас ажиллахын үр ашиг нь уг санаачилгатай хоршиж иргэдийн амьдралын чанарыг дээшлүүлэхэд нэмэртэй гэж судлаачид үзэж байна.
Хотоос гарсан гэр бүлүүд шинэ гэртээ доод тал нь таван жил амьдрах ёстой ба гэр бүлийн нэгээс цөөнгүй гишүүн ажилтай эсвэл, шинэ бизнес эхлүүлэх төлөвлөгөөтэй байх ёстой аж. Хэрэв таван жил болоогүй байхдаа хотын төв рүү буцаж нүүвэл тэтгэмжийг эргүүлэн төлөх учиртай.
Дэлхийн хамгийн олон хүн амтайд тооцогдоог Токио хотод 35 сая хүн амьдардаг. Японы Засгийн газрын тооцоолсноор 2017 он гэхэд доод тал нь 10000 хүн Токиогоос хөдөө орон нутаг руу нүүсэн байх аж.
Эх сурвалж: KyodoNews
