Мэргэжлийн сүмогийн 73 дахь ёкозүна, Терүнофүжи Гантулгын Ган-Эрдэнийн туулсан амьдралын түүхийг өгүүлэх “Ангалын ёроолоос өгсөх маргааш” нэртэй номын нээлт өнөөдөр /2023.07.25/ “Интерном” их дэлгүүрт боллоо.
Их аварга Терүнофүжи Г.Ган-Эрдэнэ номынхоо нээлтэд оролцохоор зургаан жилийн дараа эх орондоо хүрэлцэн иржээ.
Терүнофүжи Г.Ган-Эрдэнэ номоо нээж “Хүрэлцэн ирсэн та бүхэндээ баярлалаа. Би сүмо бөхийн дэвжээнд 13 дахь жилдээ барилдаж байна. Энэ хугацаанд бэртэл гэмтэл авч, уруудаж байлаа.
Энэ номыг яагаад гаргах болов гэхээр өвчний улмаас нийгмээс тусгаарлагдсан япон залуугийн түүхийг би сонссон юм. Тэр залуу сүмогийн дэвжээн дэх миний уналт, сэргэлтийг харж, “Би ч гэсэн хичээвэл зорилгодоо хүрч чадна хэмээн өөрийгөө хурцлан амжилтад хүрчээ. Миний амьдрал нэг хүний сэтгэлд гэрэл асаажээ. Тиймээс амьдралд тохиолдсон сорилтуудынхаа талаар олон хүнд хүргэе гэж ном гаргахаар шийдсэн. Монгол хэлнээ орчуулан гаргах санааг ээж минь гаргасан” гэв.
Терүнофүжи Г.Ган-Эрдэнэ 2010 онд Япон улсын Тоттори мужийн “Жёохокү” ахлах сургуульд суралцаж, 2011 онд мэргэжлийн сүмогийн “Магаки” дэвжээнд анх элсжээ. 2013 онд “Исэгахами” дэвжээ рүү шилжин орж, 2015 онд Хэйсэгийн үед төрсөн бөхчүүдээс хамгийн анхны озэки цолтон болжээ.
23-хан настай озэки гэмтэл авч өвчний улмаас сүмогийн хоёр дахь оргилоос долоон зиндаа доош унаж ч итгэхийн аргагүйгээр дахин өгссөөр Ёкозүна хэмээх мэргэжлийн сүмогийн их аварга болж байсан юм. Мэргэжлийн сүмогийн түүхэнд түүн шиг доош унасан атлаа дээшээ өгссөөр оргилд нь хүрсэн хүн үгүй ажээ.
