УИХ-ын гишүүн Ч.Лодойсамбуу Төрийн ордонд үнэмлэхээ гардан авсны дараа сэтгүүлчдийн асуултад хариулав.
“АН өмнө нь гурван удаа Эвслийн засгийн газар байгуулсан туршлагатай. Үүний үр дүнд МАНАН гэх ойлголт үүссэн. Хамтарч хулгай, авлигын схем хийсэн. Өнгөрсөн чуулганы үеэр сонсгол хийж, би, чидээ тулж, баахан юм болсон. Шинэ МАНАН үүсгэж болохгүй гэсэн байр суурьтай байна.
Энэ асуудлыг хоёр талаас харж байна. Нэг нь төрийн ажил талаасаа улс төрийн нам ямар нэг эрх мэдэл авч, түүнд таарсан хэмжээгээрээ мөрийн хөтөлбөрөө хэрэгжүүлнэ.Заавал 100 хувийн эрх мэдэл байх албагүй. Үүний төлөө сонгууль хийдэг. Нөгөө талд, эвсэхээр хяналтгүй, хариуцлагагүй Засгийн газар бий болно. Манай засаглалын хэлбэр их тодорхойгүй. Цаасан дээр, хуульд парламентын засаглалтай гэсэн ч одоо Ерөнхий сайдын засаглалтай байна.
Бодит үнэн нь энэ. Ийм нэг шалтгаан, зөвтгөл хэлдэг. Улс төржихгүйгээр, гол ажлуудаа явуулъя гэдэг. Ямар ажлууд хийх нь тодорхойгүй, өөр нам битгий хэл өөрсдөө дангаараа найман жил засаглахдаа юу ч хийгээгүй. Энэ тухай бид сонгуулиар зөндөө ярьсан. Авлигатай тэмцээгүй, төсвийн зардал нэмэгдсэн. Одоо саналын түвшинд яригдаж, МАН урилга өгч байх шиг байна. Бид нам дотроо ярилцана.
Үүний түрүүнд Засгийн газрын бүтэц бүрэлдэхүүн ямар байх, Түгжрэлийн сайд байх уу? Бид төсөв бууруулна гэчхээд Түгжрэлийг манайх авъя гэж болохгүй. Засгийн газрыг хэрхэн цомхон, мэргэжлийн болгох, Засгийн газрын зардлыг яаж бууруулах нь тодорхой болох ёмтой. Мөн зорилгогүйгээр хоёр нам нийлбэл шинэ МАНАН-г байгуулъя гэсэн санал болно. Дахин дөрвөн жил санаа амар явъя гэсэн санаархал гэдэг нь бүгдэд ойлгомжтой байна” гэв.
