УИХ-ын чуулганы хуралдаан үргэлжилж байна. Өнөөдөр Төрөөс мөнгөний бодлогын талаар 2025 онд баримтлах үндсэн чиглэл батлах тухай эхний хэлэлцүүлгийг хийж байна.
УИХ-ын гишүүнд Төв банкны удирдлагуудаас зээлийн хүүг хэзээ, хэрхэн бууруулах, бизнесийн зээлийг яаж дэмжих, хэрэглээний зээлийг хязгаарлах, ипотекийн зээлийг хэнд олгох талаар асууж хариулт авлаа.
Өмнө олон гишүүн Капитал банкны эрх хүлээн авагч хэт удаан хугацаанд ажиллаж, Үндэсний хөрөнгө оруулалтын банк, Чингис хаан банкуудад арга хэмжээ авахгүй байгааг шүүмжлэв. УИХ-ын гишүүн Н.Алтанхуяг “Чингис хаан, Үндэсний хөрөнгө оруулалтын банкуудын толгойг хэзээ болтол илэх вэ? Эдгээр банкийг хэн эзэмшдэг вэ? Та нарт улс төрчид нөлөөлж байна уу” гэсэн юм.
Эдгээр банк заавал байлгах нөөцийн хэмжээндээ хүрээгүй буюу Монголбанкнаас өгсөн гэрийн даалгавраа удаан хугацаанд биелүүлээгүй. Иймд Төв банкнаас эдгээр банканд хянагч томилон ажиллуулж байна.
Чингис хаан банкыг 100 хувь Нью стандарт финанс эзэмшдэг ба Нью стандарт финанс ХХК нь Д.Батаа, Ш.Бүтэд, Ц.Баярсайхан нарын хамтран эзэмшдэг компани юм. Харин Үндэсний хөрөнгө оруулалтын банкны 41.14 хувийг Мөнхтунгалагийн Отгонцэцэг(Асашюрү Д.Дагвадоржийн эхнэр) 29.92 хувийг Ко Сиак Хэ, 11.20 Д.Сумъяабазар, 10 хувийг fulltime system LLC (Д.Сумъяабазар, Д.Дагвадорж нарын дундын компани), 4 хувийг Д.Суъяабазарын Дамдинбазар, 3.74 хувийг UB diversified LLC(мөн Д.Дагвадорж, Д.Сумъяабазар нарын дундын эзэмшлийн компани) эзэмшдэг.
