Э.Зоригт: Х.Тэмүүжин сайд байхдаа болзол, шаардлага хангахгүй найман хүнд орон сууц олгох тушаал гаргасан

 

 

 

-Хууль зүйн сайд асан Х.Тэмүүжин тушаал гаргаж, өөрийн
хамаатан, танил, тал болох найман хүн орон сууц олгосон гэх мэдээлэл цацагдаад
байна. Энэ мэдээлэлд албан ёсны тайлбар өгөхгүй юу?

-Хэвлэлээр үнэн худал, янз бүрийн мэдээлэл цацагдаж байна. Тиймээс бодит
мэдээлэл өгөх нь зүйтэй. Хууль зүйн сайдаар Х.Дорлигжавыг томилогдсоноос хойш
яамны албан хаагчдаас сайдын нэр дээр орон сууц хуваарилдаг журам алдагдсан
талаар өргөдөл, гомдол ирэх болсон. Учрыг тодруулбал, 2014 онд яамнаас албан
хаагчиддаа хөнгөлттэй үнээр орон сууц олгохдоо дарааллын дагуу бус журам
зөрчсөн байгаа юм. Өөрөөр хэлбэл өргөдөл өгөөд 11 жил хүлээсэн хүн бус өөр
иргэдэд сайдын тушаалаар орон сууц олгожээ. Тиймээс л албан хаагчид энэ
мэдээллийг ил болгож өгөөч гэсэн гомдлыг гарган сайдад хандсан юм. Миний хувьд
ХЗЯ-нд 12 дугаар сараас хойш ажиллаж байна. Намайг ажил авснаас хойш хоёр
ажилтан энэ асуудлаар хандсан.

Улмаар учрыг тодруултал ШШГЕГ-ын барьсан БЗД-ийн 25 дугаар хороонд байрлах
орон сууцыг яаманд огт ажилладаггүй гурван хүнд өгсөн асуудал гарч ирээд байна.
Энэ дагуу ямар байгууллагад ажилладаг хэн гэдэг хүнд орон сууц олгосон талаар
баримтыг ШШГЕГ-аас бид авсан байгаа.

-Яаманд ажилладаггүй гурван хүнд
орон сууц олгосон байна гэлээ. Гэтэл хэвлэлээр найман хүнд орон сууц олгосон
тухай мэдээлэл яваад байгаа шүү дээ. Энэ талаар тодруулаач?

–Яаманд огт ажилладаггүй
Д.Дагвагүнчин, Ц.Пүрэв-Очир, н.Булган нарын гурван хүн байна гэж манай хүний
нөөцөөс мэдээлсэн. Харин үлдсэн 4-5 хүний хувьд өмнө сайдын зөвлөх, яамны
удирдах албан тушаал эрхэлж байсан хүмүүс юм. Одоо ажилладаггүй ч, өмнө нь
ажиллаж байсан хүмүүс гэж ойлгож болно. Ер нь болзол, шаардлагыг хангаагүй
найман хүнийг орон сууцанд оруулах тушаал гаргасан байна. Гэвч зарим тушаал
шийдвэрүүд олдохгүй хүндрэл учирч байгаа. Сүүлд буюу 2014 оны 11 дүгээр сарын
4-ний тушаалаар яаманд одоо ажиллаж байгаа гэхдээ болзол хангахгүй гурван
залууд дугаарлалтын журам зөрчиж ШШГЕГ-ын 160 айлын орон сууцанд байр олгосон байсан.
Энэ асуудлыг бид дотооддоо хэлэлцээд шийдвэрлэхээр болсон.

-Дээр зарим тушаал, шийдвэрүүд
олдохгүй хүндрэлтэй байгаа гэв. Яагаад сайдын гаргасан тушаал олдохгүй алга
болчихдог юм бол?

-Нэр бүхий хүмүүст байр олгосон тушаалыг архиваас хайгаад олоогүй. Тиймээс энэ асуудалд хугацаа алдсан тал бий. Гэхдээ агентлагууд руу явсан
шийдвэр, тушаалыг буцааж авах замаар нэг тушаал олсон.

-Хөнгөлөлттэй үнэ гэж чухам хэчнээн төгрөгийн асуудал яригдаж
байна вэ. Үнэ, ханшийн талаар мэдээлэл өгөхгүй юу?

– Яамны албан хаагчдад 1м2-ыг нь 900
мянган төгрөгөөр
тооцож, түүний 30 хувиар бодож олгосугай гэж
заасан байсан. Өөрөөр хэлбэл 1м2 нь 270 мянган төгрөгөөр бодож олгосон гэсэн
үг. Учир нь ШШГЕГ өөрийн нөөц болоцоог ашиглан барьсан орон сууцаа ажилчдадаа
хямд үнээр олгодог.

-Тэгэхээр танай яаманд огт
ажилладаггүй дээрх хүмүүс энэ үнээр орон сууц худалдан авсан гэсэн үг үү? Ер нь
тэдгээр иргэд хөнгөлөлтэй үнээр авсан орон сууцандаа амьдарч байгаа болов уу.
Энэ талаар мэдээлэл байна уу?

-Яаманд огт ажилладаггүй
гурван иргэнд олгосон байрны тухайд үнэ нь тодорхой бус байгаа. Хөнгөлөлттэй
үнээр байр олгох тушаал гарсан байна. Тухайн иргэд энэхүү байрандаа амьдарч байгаа
эсэхийг холбогдох байгуулагууд нь тодруулж байгаа.

-Яаманд ажилладаггүй иргэдийг
гаргаж, ажилладаг хүмүүстээ тус орон сууцыг олгох журам байдаг уу?

-Албан хаагчдынхаа нийгмийн асуудлыг шийдвэрлэх нь бидний үүрэг. Бид яаманд
ажилладаггүй хүмүүсийн асуудлаар холбогдох байгууллагуудад шалгуулахаар
хандчихсан байна. Мэдээж байрны дарааллын дагуу хүлээж байгаа иргэд орох бүрэн
боломжтой. Гэхдээ асуудлыг шалгаж байгаа учраас илүү дэлгэрэнгүй мэдээлэл
боломжгүй байна.

-Олны анхаарал татсан асуудалд үнэн,
зөв мэдээлэл өгсөнд баярлалаа.

А.Аюуш