Засгийн газрын өнөөдрийн /2025.04.16/ хуралдаанаар Монголын төр, шашин, соёл урлагийн нэрт зүтгэлтэн Өндөр гэгээн Занабазарын мэндэлсний 390 жилийн ойг 2025 онд тэмдэглэн өнгөрүүлэхтэй холбогдуулан шаардагдах хөрөнгийг Засгийн газрын нөөц сангаас гаргахаар шийдвэрлэжээ.
Ойг тэмдэглэх ажлын хэсгийг Хууль зүй, дотоод хэргийн сайд О.Алтангэрэл ахална.
Өндөр гэгээн Занабазар 1635 онд Халхын Түшээт хан Гомбодоржийн хоёрдугаар хөвгүүн болж, Ханджамц хатнаас одоогийн Өвөрхангай аймгийн Зүйл сумын Есөн зүйл гэдэг газарт төржээ.
1640 онд Далай лам, Банчин Богдоос Жавзундарнатын хувилгаанаар тодруулан Занабазарыг таван настайд нь анхдугаар Богд Жавзандамба хутагтын ширээнд залж, Халх Монголын шарын шашны тэргүүнээр өргөмжилжээ.
Өндөр гэгээн багаасаа шарын шашны судар хийгээд тарнийн сургаал, номлол, зан үйлд суралцаж улмаар 1649 онд Цастын орныг зорин Банчин Чойжилжанцан Богдод бараалхан шавь орж шашны таван их ухааныг заалган эш онолын эрдмийг төгс эзэмшээд эх нутагтаа буцан ирж номын хүрээ хийд, сургуулийг олноор байгуулсан.
