Apple компани уламжлал ёсоор шинэ бүтээгдэхүүнээ дэлхий нийтэд танилцууллаа. Тус компанийн захирал Тим Кук өчигдөр/2025.09.09/ iPhone, Apple Watch, AirPod-ийн шинэ загваруудаа дэлгэж, урьдчилсан захиалгаа эхлүүлэв.
iPhone 17: Уламжлалт загвар
Энгийн стандарт iPhone 17 загвар шинэчлэгдэж, ProMotion технологитой 6.3 инч дэлгэцтэй болжээ. Мөн А19 чип, 48MP хоёр камерын систем, цоо шинэ Center Stage урд камер нь таныг гар утсаа хөндлөн барихгүйгээр хэвтээ, босоо зураг дарах боломжийг бүрдүүлжээ.
48MP камер нь телефото функцийг хоёр дахин илүү дэмжих бөгөөд 48MP ультра өргөн камер нь макро гэрэл зураг дарах боломжийг бүрдүүлнэ. Мэдээж батерей нь сайжирч, 30 цаг тасралтгүй бичлэг үзэх боломжтой болсон гэнэ.
Хамгаалалтын тухайд дэлгэц нь Ceramic Shield 2 гэх сайжруулалтыг хийж, зурагдахаас гурав дахин сэргийлэх аж. Тооцооллын хувьд iPhone 17 гар утас нь 3nm технологитой А19 чиптэй. Цоо шинэ зургаан цөмтэй CPU нь цахилгаан зарцуулалт, батерейн насжилтыг тэнцвэржүүлэх учиртай.
iPhone 17 гар утсыг 20 минут цэнэглэхэд нь батерейгаа 50 хувь хүртэл дүүргэнэ.
Өнгөний тухайд хар, цагаан, манан цэнхэр, sage, лаванда гэж байх бөгөөд үнийн тухайд 256GB багтаамжтай нь 799 ам.доллар.
iPhone Air: Гайхмаар нимгэн
Анх удаа олны хүртээл болж буй iPhone Air нь 5.6 мм нимгэн гэж байгаа нь Apple-ийн түүхэн дэх хамгийн нимгэн iPhone гэнэ. iPhone-ийн дотоод архитектурыг бүрэн шинэчилж, ийм нимгэн гар утсыг гарган авчээ.
ProMotion технологитой 6.5 инч супер Retina XDR дэлгэц нь 120 гц-тай. Титаниум хүрээнийх нь 80 хувийг дахин боловсруулсан бөгөөд дэлгэц болон арын хэсэг нь Ceramic Shield 2 хамгаалалттай. Мэдээж маш нимгэн гар утас учир үүнийг бат бөх болгох хамгийн сайн хамгаалалтыг шингээжээ.
Камерны тухайд 48MP-тай ганц төв камертэй бөгөөд 2x телефото авах чадвартай. Харин урд камер нь 18MP. Мэдээж А19 Pro чип, С1Х үүрэн модем, N1 утасгүй чиптэй гэж байгаа нь iPhone-ийн түүхэн дэх хамгийн эрчим хүчний хэмнэлттэй загвар гэх тодотголыг авчээ.
Өнгөний тухайд сансрын хар, үүлэн цагаан, цайвар алт, тэнгэрийн хөх гэсэн дөрвөн сонголттой. Үнийн хувьд 256GB багтаамжтай нь 999 ам.доллараас эхэлж байна.
iPhone 17 Pro: Хална гэж айлтгүй
Apple-ийн iPhone 17 Pro-д хөргөлтийн цоо шинэ систем сууж, хөнгөн цагаан их биеийг халахаас бүрэн сэргийлжээ. Үүний ачаар цэнэг зарцуулалт 40 хувиар буурсан аж.
Камерны тухайд гол, ультра өргөн болон телефото гэсэн гурван 48MP камертай. Дахин загварчилсан телефото камер нь найм дахин татаж, ойртуулж авах боломжийг олгохоос гадна гэрэл тааруу орчинд зураг авах боломжийг өмнөх загвараасаа 56 хувиар нэмэгдүүлж өгчээ. Мэргэжлийн бичлэг хийх боломжийг бүрдүүлж, ProRes RAW, Apple Log 2, genlock синхрончлол гэх зэргийг багтаажээ. Урд камер нь 18MP.
Дэлгэцийн тухайд 6.3 инч болон 6.9 инч гэсэн хоёр сонголттой. Батерей нь 39 цаг тасралтгүй бичлэг үзэх боломжийг олгоно.
Өнгөний тухайд улбар шар, хар хөх, мөнгөлөг гэсэн гурван сонголттой бол үнийн тухайд 256GB Pro нь 1,099 ам.доллараас, 256 GB Pro Max нь 1,199 ам.доллараас тус тус эхэлж байна.
