Ардчиллын анхны 13 гишүүний нэг Санжаасүрэнгийн Зориг 1962 оны дөрөвдүгээр сарын 20-нд Улаанбаатар хотод төрсөн. Тэрбээр 1998 оны аравдугаар сарын 2-ны өдөр 36 насандаа бусдын гарт харамсалтайгаар амь насаа алдсан.
Түүнээс хойш 27 жил өнгөрчээ.
Жил бүрийн аравдугаар сарын 2-ны энэ өдөр ард түмэн, гэр бүлийнхэн, журмын нөхөд нь түүний дурсгалд нь зориулан босгосон хүрэл хөшөөнд цэцэг өргөсөөр ирсэн. Өнөөдөр ч мөн Ардчилсан намын удирдлагууд, журмын нөхөд нь хөшөөнд цэцэг өргөж, хүндэтгэл үзүүлэв.
Энэ үеэр УИХ-ын гишүүн С.Цэлмүүн “Би хувьдаа энэ хэргийг хэдийнээ илэрсэн гэж үздэг. Тиймээс ч энэ хэргээр үргэлжлүүлэн улстөр хийхийн эсрэг байр суурьтай байдаг. С.Зориг бол Монгол Улсын ардчиллын, эрх чөлөөний бэлэг тэмдэг болсон хүн. Тиймээс бид түүний үзэл санааны үйл хэрэгт илүү анхаарч үргэлжлүүлэх хэрэгтэй гэж үзээд өнгөрсөн жилийн энэ өдөр “Зориг ардчиллын хүрээлэн”-г үүсгэн байгуулснаа зарласан.
Бид өнгөрсөн нэг жилийн хугацаанд баруун төвийн үзэл санааг Ардчилсан намынхаа үйл ажиллагаанд тогтворжуулахаар ажиллалаа. Улстөрийн намын тухай хуулийг энэ оны 12 сарын 31-нд шинээр өргөн барьж, намууд хөтөлбөрөөр шинээр батална. Үүгээр нам үзэл баримтлалаа тодорхойлох юм.
Энэ цаг үед Ардчилсан намын эв нэгдэл үе, үед байгаагүйгээрээ хамгийн хүчтэй байгаа. Энэ утгаараа олон жилийн хагаралдаан эцэслэгдэж, дараа дараагийн сонгуульд ялах улстөрийн том хүчин гэдгээ олон үйл явдлаар харуулж байгаа гэж бодож байна” гэлээ.
